قلبي لمن امل نصر

ناول جمال الهاتف لعبد الرحمن بعد أن فتح له “الاستوديو” على صورةٍ معينة، وتابع بنبرةٍ تبدو عفوية:

ـ “أهو.. قَلّب بنفسك يا باشا وارجع لورا في الصور وشوف التشكيلة.”

تركزت عينا عبد الرحمن على الشاشة، يتمعن في أول صورة ظهرت أمامه؛ كانت لعقدٍ مشغول بإتقانٍ مذهل، فلم يستطع إخفاء انبهاره وقال بتقدير:

ـ “ما شاء الله.. واضح إن كلامك صح، العقد جميل فعلاً وشغله عالي.”

علق جمال بعجالة ولهفة، وكأنه يدفعه دفعاً لمزيد من المشاهدة:

ـ “قَلّب كمان.. شوف في كتير، وارجع في الصور براحتك، أنت مش غريب يا صاحبي.”

بدأ عبد الرحمن يعود بالصور كما طُلب منه، منبهراً بجودة العمل، بل وبدأ يعطي ملاحظات فنية بصفته خبيراً في هذا المجال.. وفي عز اندماجه وتركيزه، تجمدت أصابعه فجأة فوق الشاشة، واتسعت عيناه بصدمةٍ جعلت الدماء تغلي في عروقه.

نزع نظارة الإضاءة التي كان يرتديها للتدقيق في الشغل، وحدق في الصورة التي ظهرت أمامه وكأنها صاعقة، ثم رفع رأسه ونظر لجمال بعيونٍ يقدح منها الشرار، فسأله بنبرةٍ مخنوقة من الغضب والاستنكار:

ـ إيه ده؟ إيه اللي جاب صورة ياسمين على تليفونك..؟!

أظهر جمال “خضة” مصطنعة وهو يخطف الهاتف من يد عبد الرحمن، ثم نظر إلى الصورة وقال بنبرة تمثيلية يملؤها الأسف الزائف:

ـ “يا نهار أبيض! ده أنا كنت ناسي خالص إن الصورة دي لسه موجودة.”

انتفض عبد الرحمن من مكانه وهدر فيه بغضبٍ زلزل أركان المكتب:

ـ “ناسي إيه بالظبط؟ ناسي صورة خطيبتي على تليفونك!

رد جمال ببرود واستخفاف مستفز، وهو يضع الهاتف في جيبه بهدوء:

ـ “بس أنت لسه مابقتش خطيبها رسمي.. على العموم يا سيدي، اللي حابب أوضحه إني كنت ناسي الصورة فعلاً، أصلها موجودة على التليفون من فترة طويلة قوي، من قبل حتى ما أخطب سما أختها.”

توقفت أنفاس عبد الرحمن للحظة، وزادت نظراته اشتعالاً وهو يردد الكلمة بذهول وعدم استيعاب:

ـ “من قبل ما تخطب سما؟! إزاي يعني؟  إيه بالكلام اللي بتقوله ده؟”

هنا، ارتسمت على وجه جمال ضحكة مقيتة، ضحكة المنتصر الذي ألقى بقنبلته وينتظر الانفجار، ورد بنبرةٍ مسمومة:

ـ “أيوة يا صاحبي.. قبل ما أخطب سما، أصل ياسمين هي اللي كانت خطيبتي أنا الأول، او اللي كنت هخطبها في البداية، لكن النصيب بقى على حاجات!.