متاهة مشاعر الجزء الثاني نهى طلبة

لقد صدمها في الواقع فهي لم تتخيل بعد تلك العواصف التي يثيرها بها أن يصمم على اتمام زواجه.. هل كان يتلاعب بها؟.. أم أنها كانت تسلية متاحة؟.. هل سيعود مرة أخرى ليغوص بها لبحار حبه؟.. أم أنه ابتعد تلك المرة إلى الأبد؟…

أخذت أناملها تداعب ملامحه المرسومة وهي تتساءل بحيرة عن مشاعره.. وإن كانت نظرة التوق التي تلمحها في عينيه حقيقية أم لا؟..

تكاد تجزم أنها لم تلمحه ولا مرة واحدة يرمق ريناد بتلك النظرة.. ولكن ماذا تعرف هي عن لحظاتهما المنفردة معاً؟..

لم تعرف أن في تلك اللحظة بالذات كانت ريناد ترمق يزيد بتأمل وهي تسأله:

ـ مالك يا يزيد؟.. أنت متغير اليومين دول..

ـ أنا متغير!!.. لا أبداً بيتهيألك… أنتِ عملت ايه في الفيلا؟.. خلصتِ ولا لسه؟..

شهقت بقوة:

ـ خلصت؟.. خلصت ايه؟.. أنت مش عارف أني طول الأسبوع ده كنت مشغولة بحفلة حسن صاحبك.. وبعد كل التعب والمجهود اللي عملته.. يطلع كان عامل الحفلة عشان يفركش خطوبته..

ازدرد يزيد لعابه بتوتر:

ـ ايه اللي أنتِ بتقوليه ده؟.. هي مش نيرة رمت له الدبلة قدامك وقدام الناس كلها..

هتفت به بحنق:

ـ يزيد.. ما تضحكش عليّ.. أنت عايز تفهمني أنه نيرة فسخت خطوبتها لحسن وبعد ساعة واحدة بس هو اتجوز بنت السواق.. وعمل لها الفرح اللوكال ده!..

ازداد توتر يزيد وهو يسألها:

ـ قصدك ايه؟..

ـ قصدي أن كل حاجة كانت مترتبة.. لعبة وحسن لعبها صح.. وللأسف أنا ساعدته على كده من غير ما أعرف.. وأنت خدعتني عشان أساعده..

ـ أنا؟..

ـ أيوه أنت.. مش أنت اللي اتوسط له عشان أجهز له الحفلة وأنت عارف كويس قوي هو ناوي على ايه؟؟.. وبعد ده كله جاي تشهد على عقد جوازه من البنت اللي اسمها منى دي.. وجاي الوقتِ تسألني على تجهيزات بيتنا؟..

ابتسم يزيد بسخرية:

ـ آه.. قولتِ لي.. يعني المحاضرة دي كلها مش عشان نيرة.. لا عشان تفهميني أن تجهيزات البيت محلك سر.. وأنك عاوزة تأجلي الجواز طبعاً.. بس يكون في علمك.. ميعاد الفرح مش هيتغير حتى لو البيت على البلاط..

هتفت ريناد بغيظ:

ـ يزيد.. أنا مش بتحجج.. ولا بهرب.. فعلاً أنا متضايقة من الموقف اللي اتحطت فيه نيرة.. رغم أنها مش صاحبتي.. وأن علاقتنا مش قوية.. لكن اللي حصل لها النهارده ما يرضنيش أبداً.. وكونك جزء من المؤامرة دي.. بيضايقني أكتر..