عشق الرجال الجزء الرابع

– وأنتِ هتفضلى سايبه جوزك وقاعده هنا

نظرت حسناء إلى أمها بقلق ثم إلى جدها وقالت

– راشد هيعدى عليا بليل و هنروح

هز الحج عمران رأسه بنعم ثم قال

– كويس …. طلعتى عاقله

نظرت وداد إلى حسناء دون أن تهتم بكلمات عمران وقالت بلوم

– هتسيبينى وتمشى هتسيبى أمك فى إللى هى فيه ده وتروحى مع الراجل إللى

ضرب عمران سطح الطاولة بيده ليقطع سيل كلماتها وقال

– وداد مسمعش منك كلمه تانيه زياده أوعى تفكرى للحظه تغلطى فيهم بدون سبب …. موت حمزه جوز بنتك ومرات إبنك ملهمش علاقه بيه

ثم نظر إلى تمام وقال

– وأنت ناوى تسيب مراتك عند أهلها كتير ولا أيه هى مكانها فى بيت جوزها

اخفض تمام رأسه لعدة دقائق ثم قال

– مراتى أمى طردتها من بيتها وبيتى يا جدى ده غير أنها أصلاً وأكتر من مره قالتلها أنها مش عايزاها ومش قابلاها فبعد إذنك يا جدى وبعد إذنك طبعاً يا بابا أنا هشوف بيت بره علشان أريح أمى واحفظ لمراتى كرامتها

ظل الجميع صامت أمام كلمات تمام التى لا يستطيع أحد رفضها هو باقى على أمه و زوجته وهذا حقه وقفت وداد على قدميها وهى تشعر بالفخر بابنها وخوف من خسارته اقتربت منه ليقف تمام ينظر إليها بحب حقيقى لا يشبه أى حب

لتقول هى بصوت متألم

– أنت كمان هتسبنى يا تمام زى ما أخوك سابنى أنا مش عايزاك تبعد عنى خليك يا ابنى هنا خليك وأنا مش هكلمها تانى مش هاجى جمبها ولا هضايقها تانى أبوس إيدك يا ابنى

كان الجميع يتابع ما يحدث بقلوب متألمه انحنى تمام وقبل يدها وهو يقول

– يا أمى متقوليش كده صدقيني ورد بتحبك ونفسها تلاقى فى حضنك إللى كانت طول عمرها محرومه منه أنتِ أمى وفوق راسى وجنتى تحت رجلك وهى مراتى و ربنا هيحاسبنى عليها لو ظلمتها

رفعت وداد رأسها وأمسكت رأسه بيدها لينحنى لها من جديد لتقبل رأسه وهى تقول

– ربنا ما يحرمنى منك يا ابنى …. وحقكم عليا

وألقت نظره سريعه على الجميع وغادرت غرفة الطعام كاد تمام ان يلحق بها ولكن أشار إليه والده أن ينتظر وقال بهدوء

– أنا هشوفها هى دلوقتى محتجانى أنا …. وأنا كمان محتاجها

وغادر الغرفه بهدوء وظل الباقيين ينظرون إلى بعض بحالة حيره وقلق وأيضاً شفقه

جلس تمام من جديد فى مكانه ليقول له عمران