عشق الرجال الجزء الرابع

ظل ينظر إليها ثم قال بحزن وحرقه وألم

– مات بعد ما كسرنا كلنا … بعد ما ساب جوه كل واحد فينا تشوه ملوش علاج … لا وكمان لما مات مات بفضيحه وعار عار هندفع أحنى تمنه

كانت تتفهم احساسه سليمان القوى المعتز بنفسه يحدث له ذلك الأمر وعلى الملاء ويشعر أن الجميع من حوله يشعرون بالشفقه عليه لهو جرح لرجولته

أكمل هو بغضب وحقد

– تفتكرى ممكن تمام فى يوم يعاير ورد بالى حصل

طيب حسناء مش كفايه حكايه راشد وبنته إللى وقعت عليه من السما لكن اهى أعماله وكنا بنحاول نلم الموضوع لكن

صمت لثوان ثم نظر إليها بنظره لم تفهمها أو خشيت أن تفهمها حين قال

– وأنتِ هتفتكرى بقى أنى خلاص عينى مكسوره قدامك مش كده وانى مش الراجل اللى

صمت لم يستطع أن يكمل كلامه وهى كانت تشعر

بصدمه قويه كيف يفكر بها بتلك الطريقه كيف وجرحه هو جرح كل العائله وما ستلوكه الألسن سوف يطول عائلة الوريدى بالكامل وكيف يرى أنها تريده مكسور أمامها وأن لا يكون له كلمه أمامها

اقتربت خطوه أخرى وامسكت يده وقالت وهى تنظر إلى عينيه بحب

– سليمان الكلام إلى أنت بتقوله ده مش حقيقه أنا وبحبك وأبوك هو عمى ولو الناس هتتكلم فالكلام هيمس العيله كلها … و بعدين أنت جوزى حبيبى عمرك ما تنكسر قدامى … لأن أنا وأنت واحد وكمان ما تخفش تمام بيعشق ورد وعمره ما يفكر بالطريقه دى وكمان حسناء أطمن

ظل ينظر إليها بشك وحيره لتقول هى

– تعال نطلع اوضتك نرتاح شويه علشان نقدر نروح المستشفى لجدى كمان بابا محتاجنا كلنا جمبه أخوه التانى كمان مات وأبوه ربنا العالم بيه

هز رأسه باستسلام فهو حقا لم يعد لديه القدره على الجدال أو الحديث

•••••••••••••••••••••••••••••••••••••••••••••••••••

استيقظت من نومها تنظر حولها بعدم فهم حتى وقعت عينيها عليه نائم على الكرسى الجانبى اعتدلت من نومها وجلست تنظر إليه بخوف ليس منه ولكن من خسارته تذكرت ما حدث منها حين صعد إليها وهى تشاهد ذلك الرجل وهو يهزى بكلمات فضحت كل شىء قد ستره الموت حين شعرت به يضمها ابتعدت عنه سريعاً وهى تنظر إليه نظرات قاتله بها ازدراء ولكن ليس منه هو بل من نفسها وبدأت فى قول

– أبعد عنى أنا أنا أقل بكتير من أنك تهتم بيا واحقر بكتير من أنك تشوفنى ليه أنا عملت أيه علشان أعيش كل ده عملت أيه غلط فى حياتى علشان الراجل ده يبقى أبويا عملت أيه غلط علشان أعيش عمرى كله فى ذل وهو عايش وأعيش بعار وهو ميت عملت أيه