عشق الرجال الجزء الرابع

الفصل الثلاثون

جلس أمامه وهو مقطب الجبين لا يعلم ماذا عليه أن يقول وأيضاً ذلك الطبيب الصامت ينظر إليه ببرود نفخ حمزه بضيق ثم وقف على قدميه وتوجه إلى الباب ليقول الطبيب سريعاً

– على فين يا سياده الرائد

نظر حمزه إليه بغضب وقال

– ماشى ما أنا مش جاى هنا اتأملك ولا أسمع صوت سكاتك

ليبتسم الطبيب وهو يقول بهدوء

– أنا ساكت علشان أسيبك على راحتك ومضغطش عليك

ليزداد الغضب داخل حمزه وهو يقترب من مكتب الطبيب وقال بعد أن ضرب سطحه بقوه

– هو أنا جاى علشان أفضل ساكت أنت دكتور حقيقى ولا أى كلام أدى آخرة إللى يطلب مساعده من أبن عمته

ليضحك الطبيب وهو يقف على قدميه ويتحرك من خلف مكتبه ليقف أمام حمزه مباشرة وقال بهدوء

– مين أبن عمتك ….ويعرفنى منين علشان ينصحك تجيلى

نفخ حمزه بضيق ثم قال

– أنا مش جاى أتكلم عن رحيم أنا جاى عايز حل للى أنا فيه

ليعود الطبيب إلى خلف مكتبه و جلس بأريحيه وقال

– دكتور رحيم النادى يبقى ابن عمتك يا أهلا وسهلا اتفضل أقعد ده أنت جاى بوسطه كبيره ولازم نكرمك

قال كل هذا وهو يشير له أن يجلس ويفتح النوت الخاصة به وقال بجديه

– خير ان شاء الله أيه المشكلة

ظل حمزه صامت ينظر إليه باندهاش أنه شاب فى نصف الثلاثين خمرى البشره وسيم بشكل ما لديه لحيه مميزه و يرتدى نظاره تعطيه هيئه تحترم لكن حين يتكلم تشعر أنه مجنون وليس طبيب

طال صمت حمزه ليقول الدكتور أكرم

– مش عارف تبدء منين …. قول الحكاية من أولها

لم يشعر حمزه بنفسه وهو يخرج كل ما بصدره كل ما كتمه طوال هذه الشهور ما فعلته علياء شعوره بهدر كرامته وطعنة الخيانة و عدم قدرته على جرحها وايهانتها رغم أنه يقوم بذلك يوميا ولكن قلبه يشعر بالجرح قبلها

كان أكرم يستمع إليه باهتمام شديد وتركيز عالى يدون خلفه بعض الملاحظات حتى صمت حمزه تماما وهو يلهث كأنه كان فى سباق

أغلق الطبيب النوت الخاص به ونظر إلى حمزه بتركيز شديد ثم قال

– لسه بتحبها

ليقطب حمزه حاجبيه وهو يقول

– مقولتش جديد

ليهز الطبيب رأسه بلا وقال

– إللى واجعك أنك لسه بتحبها رغم كل إللى حصل مش قادر تكرهها

أنتبهت حواس حمزه لكلمات الطبيب ليكمل الطبيب بهدوء وهو يتفرس ملامح حمزه وردود أفعاله

– أنت كرمتك أتهانت اتخنت ومع ذلك مقدرتش تبعد عنها مش علشان كل الكلام إللى أنت قولته أنها بنت عمك وشرف العيله لأنه ببساطه أنت كان ممكن تلاقى مليون عذر وسبب وكنت ممكن تسيبها لكن أنت مقدرتش تعمل كده لأنك لسه بتحبها رغم أنها داست على رجولتك لكن قلبك لسه ملك أديها