متاهة مشاعر الجزء الثالث

همس في أذنها:

ـ خلاص يا علياء.. أنتِ سلمتِ الأمانة لصاحبها.. وأنا الوقتِ المسئول عنك.. انسي الليلة دي.. انسيها وأنا هنساها.. ونبدأ من جديد..

ازداد بكائها ونحيبها.. كيف يبدآن من جديد؟.. كيف وهو سيتزوج من ريناد؟..

عاد يهمس:

ـ علياء.. كفاية.. أنتِ عارفة أن دموعك نقطة ضعفي..

رفعت رأسها عن صدره وهي تحركه غير مصدقة ما سمعته للتو وتحركت بعيداً عنه.. بينما تجمد هو الآخر وكأن كلماته خرجت بدون إرادته..

ـ أنت عايز تجنيني يا يزيد.. صح.. قبل كده قلت لك بطل الشيزوفيرنيا دي.. وزعلت مني؟.. بس أنت فعلا هتجنني.. نبدأ إزاي؟.. وفرحك اللي بعد كام يوم؟.. أنا كنت فاهمة أن جوازنا مؤقت.. وأنك هتنتظر لحد ما عمو عصام يهدى وتطلقني..

رفض بعنف:

ـ لا.. ما فيش طلاق..

ـ وتانت سهام.. وريناد.. و..

مسح وجهه بكفه وهو يزفر بحيرة:

ـ كل شيء هيتحل في وقته.. لكن طلاق.. ما فيش.. فاهمة.. واستعدي بعد ما تخلص قصة الفرح دي.. أنك هتتنقلي القاهرة.. أنا وصيت مازن يدور على شقة كويسة..

فتحت عينيها بذهول غير مصدقة ما يقوله:

ـ أنت بتتكلم جد!

ـ أكيد مش بهزر في حاجة زي كده..

ـ بس..

ـ ما فيش بس.. ده اللي هيحصل.. وعلى ما نكون جهزنا الشقة هتكون الصورة وضحت عند الناس كلها..

صمتت ولم تعرف بم ترد.. فما يقوله يعني أنها ستصبح زوجة ثانية.. أو أولى.. لا تعرف ماذا تطلق على نفسها؟.. ولكنها تعلم أن سهام ستقت,لها وستقيم حفل شواء على جسدها وستساعدها ريناد بلا شك!..

كانت غارقة في أفكارها فلم تشعر أنه اقترب إلا بعد أن لف خصرها بذراعه وهو يهمس لها:

ـ وباقي إجابة سؤالك.. أنا جيت لأنك وحشتني.. وحشتيني قوي..

وعاد صوت نجاة يصدح..

“ياللي آمر من بعدك لقاك ياللي أمر من هجرك رضاك
يا غربتي وأنت بعيد عني يا غربتي وأنت قريب مني”

ضمت نفسها لجسده أكثر وهي تجيبه بمثل همسه:
ـ واجابة سؤالك أنت هتفضل حبيبي لآخر لحظة في عمري..

“يا حب.. أقول له ايه؟.. يا حب.. أسامحه ليه؟.
دا العذاب هو اللي يسامحه والسهر هو اللي يسامحه
والدموع هي اللي تسامحه”

الفصل الرابع عشر

وقف مازن وقد فرج ساقيه وكتف ذراعيه على صدره تشع من حوله طاقة من الغضب تعكسها عيناه بوضوح وهو يتأمل دنيا التي جلست على أحد المقاعد وقد شبكت أناملها, تهز ساقها بلامبالاة وقد وضعتها فوق الأخرى فانكمش طول التنورة القصيرة من الأساس فكانت تصل بالكاد إلى منتصف فخذها…