عقاب مؤجل ناهد خالد
ضحكت ساخرة:
-بحبك! عشان بعيط فكرتني بعيط على حبي الي ضاع! لا خالص أنا بعيط على غلطتي الي متغتفرش بعيط على ذنب هعيش بيه عمري كله, وصمة عار مش هعرف اتخلص منها, بعيط على إني حرمت نفسي اني في يوم أعيش الأجواء دي وحرمت علي نفسي الفرحة… عرفت بعيط ليه!
-ليه كل ده! تقدري تعيشي كل ده لو ..
قاطعته وهي تلتفت له بعنف وغضب وتضربه بقبضتها في صدره:
-لو ايه ها! لو قبلت اتجوزك! أنتَ لو آخر راجل في الكوكب مش هتلمسني ولا هكون على اسمك.
ضحك ساخرًا وهو يمسك قبضتها وقربها منهِ رغم محاولتها للفكاك وقال:
-ازاي عمري ما هلمسك! أنا مش آخر راجل في الكوكب, بس أول راجل لمستك واعتقد إني هبقى الأخير ولا ايه!
تسارعت أنفاسها وهي تطالعه بقهر ليكمل بغضب طفيف:
-رغد شاورتلي على محمد ده, ابن خالك, بتقولي إن والدتك وأهله نفسهم لو ترتبطوا وكده.. بس يا ترى بقى أنتِ ممكن توافقي! طب لو وافقتي هتقوليله الحقيقة ولا هتسبيه على عماه! ولو قولتِ الحقيقة أمك هتستحملها! ولا أختك !
شدت قبضتها منهِ بعنف وهي تسأله بغضب:
-أنتَ عاوز ايه, عاوز مني ايه ربنا ياخدك.
طالعها بهدوء وهو يجيبها:
-نرجع لبعض زي ما قولتلك امبارح, ووقتها خطوبتي باختك هتنتهي.
هزت رأسها بحزن:
-أختي طيبة متستاهلش الي بتعمله فيه ولعبك بيها!
رفع منكبيهِ بلامبالاة:
-وأنا مستهالش الي بتعمليه فيَّ بقالي 3 سنين بحاول معاكِ نرجع لبعض, وأنتِ عارفة إني بحبك ومعنديش استعداد احب غيرك, فلو هعيش عمري كله أحاول معاكِ معنديش مانع.. وعلى فكرة جوازي من أختك مش هيمنعني أنا ممكن اطلقها في أي وقت وارجعلك.
” ملحوظة للي مش عارفها.. ممكن زوج الأخت يتجوز أخت مراته في حالتين طلاق الأولى أو موتها.. لكن الجمع بينهم هو الي حرام”
-أنتَ مجنون! متخيل إن حتى لو قبلت هتسيب اختي وتيجي تتجوزني عادي وهم هيوفقوا!.
قال بهدوء:
-لأ مش عادي, مش هيعرفوا أصلاً .. هنرجع لبعض زي ما كنا, الورقة لسه معايا على فكرة وممكن اعمل ورقة جديدة لو تحبي.
طالعتها بعدم تصديق وهي تهز رأسها نافية بقهر:
-عرفي تاني!…
#عقاب_مؤجل #الفصل_الرابع
-أنتِ الي مش موافقة اتقدملك رسمي, خلاص خلينا نرجع نتجوز عُرفي لحد ما تحسي إنك مستعدة تواجهي أهلك ووقتها اتقدملك.