الفصل الثاني والعشرين لولا الغرام بقلمي روز أمين

من بينهم كانت “بسمة”، التي لفت شال فلسطين الشهير حول كتفيها بنخوة، ورفعت لافتة بيضاء كُتب عليها بخط عريض: “عاشت فلسطين حرة مستقلة”.

وسط هذا الوهج الحماسي، رفع الرائد هشام يده ببرود قاتل، وقال بصوت جهوري هادئ لكنه يحمل نبرة الآمر:

-بطل يا ابني أنت وهو اللي بتعملوه ده خلونا نعرف نسمع بعض.

خمدت الأصوات تدريجيًا وساد الصمت، ليوجه إليهم هشام سؤاله بنبرة متهكمة:

-ممكن أعرف آخرت الهبل اللي أنتوا عاملينه ده، وايه الغرض منه؟

رد القائد الشاب من فوق الأكتاف بقوة وثبات:

-طلبتنا بسيطة وواضحة يا فندم، عاوزين نخرج ونكمل مسيرتنا.

سأله هشام بهدوء وثقة حذرة:

-أنت بقى الزعيم اللي مجمع العيال دي معاك؟

لم تتحمل بسمة الكلمة، فاندفع صوتها حادًا وقويًا يخرق الصمت:

-إحنا مش عيال حضرتك، إحنا شباب وطلبة محترمين.

التفتت عينا هشام نحوها، ونقل نظراته الغامضة إلى ملامحها الثائرة، ارتسمت على شفتيه ابتسامة ساخرة، مجردة من أي مشاعر، وقال:

-ماشي يا ست المحترمة.

ثم أشار بيده نحو الساحة قائلاً بلهجة حازمة لا تقبل النقاش:

-ارجعوا لورا شوية وارموا اللافتات دي من أديكم، واقفوا طابور علشان نخرجكم من هنا، وكل واحد هيخرج يتفضل على بيته حالاً، وإلا..

وقبل أن يكمل وعيده، قاطعته بسمة بإصرار عنيد تلمع به عيناها:

-إحنا مش هنخرج من هنا غير على ميدان التحرير، حضرتك إحنا عاملين مظاهرة سلمية.

بأصابع واثقة وحركة تنضح بالجاذبية والهيبة، خلع هشام نظارته الشمسية السوداء، لتظهر عيناه الحادتان الفاحصتان.

حدق في وجهها مباشرة، وسألها بسخرية لاذعة:

-ويا ترى يا أستاذة سلمية، معاكم تصريح بالمظاهرة دي؟!

تدخل القائد مسرعًا ليخفف من حدة المواجهة، ورد بهدوء:

-إحنا قدمنا قبل كدا كذا مرة وطلبنا اترفض يا افندم، وبعدين يا فندم إحنا مش ناويين نعمل مشاكل، مظاهرتنا هتكون سليمة زي ما قولنا لحضرتك.

هز هشام رأسه، وتبدلت نبرته الساخرة إلى واقعية حازمة تشرح أبعاد الموقف الأمني:

-ده اللي أنت ناويه، لكن فيه ناس كتير بتحب تركب الموجة وتستغل التجمعات دي وتخلق فوضة صعب التحكم فيها، وللأسف بتنتهي دايماً بكوارث، بلدك فيه كتير مترصد لها، ومستنيين أي فرصة، علشان كده أي مظاهرة لازم تكون بتصريح ومؤمنة من قوات أمن لحمايتكم أولاً، ومنع أي أعمال شغب.