أنا جوزك الجزء الثالث

شهد:بس غريبه.. ازاى تقعد معاكى وتتكلم وتحكى كده.. حتى تحكى عن شخصيتها وعقدتها فى الحياة.. ومع مين.. معاكى انتى.. ماعلش يعني انتى ست وعارفه ان الست بتحس بجوزها وهى اكيد حست ان جوزها ميال ليكى.

ملك بحزن:ماهو عشان كده.. هى حاسة.. وللأسف حاسة كمان انه ناوى على كده وهى مش هتقدر ترجعه.. انتى عارفه انها كانت بس عايزه توصلى إنها بنى ادمه مش وحشه وماتستاهلش الاذيه.. طب انتى عارفه ان حتى عز اتجوزها عشان متكبره ومغروره.

جحزت اعين شهد وقالت :معقول… ده واطى اوى.
ملك:بصى مانقدرش نقول واطى ولا لأ… بس الى فهمته انه بدأ من تحت اووى كان بيشتغل فى مصنع كراسى بلاستيك في الوراق… ولما جمع قرشين وبدأ كان برضه سمكه صغيرة وسط حيتان…شويه بشويه بدأ يكبر بس فضل وسط رجال الأعمال عز العشوائي… كان عايز واحدة برستيج وياما هنا ياما هناك وساعتها كانت ماهى حدث ولا حرج. معروف عنها انها تنكه ومغروره.. مناخيرها في السما ومش شايفه على الارض غيرها.. هى الناس والباقى شبه الناس.. فلما يبقى ارتبط بيها ووافقت عليه يلمع اكتر واكتر.

شهد بتأثر:الحيواااان.
ملك:بصى هى برضه مانكرتش حاجة.. قالت انه كان طيب وكويس معاها وبيتعامل بأدب واحترام وكل طلابتها مجابه.
شهد :طب ما اتغيرتش معاه ليه بقا.
ملك :لأنه ببساطة كان زيه زى معظم الرجاله شايف ان الراجل بنك فلوس وانه طالما التلاجه مليانه والبيت فيه فلوس يبقى كده مهمته كملت.. كل مناسبه كانت تبقى مستنيه حتى ورده ب5جنيه مثلا دليل انه افتكرها وفكر فيها مش شرط حاجة غاليه.. تلاقيه اصلاً ناسى المناسبه ويفكر انها عايزه هديه بس فايروح مديها مبلغ حلو او الكريدت كارد تشتري الى هى عايزاه ويغرق اكتر واكتر في شركته وأعماله ومشاريعه… فساهم فى انه يحولها لانسانه بتعوض نفسها وغياب جوزها عنها بالفلوس والشوبنج والبدى كير والمنيكير فازادت بشاعة صورتها قدام الناس اكتر واكتر.

شهد باسى:صعبة عليا اوى.. وهو كمان جنى عليها.
ملك:فعلاً.. انتى تعرفى انها وافقت تتجوزوا دونا عن شباب تانيه كتير لأنها شافت فيه ابن البلد. الواد ابن الحاره العفيجى الى دمه حامى بس يعرف يحتوى الست الى فى حياته.. وهو فعلاً كده بس دوامة أحلامه وطموحاته كانت وخداه… ولما بدأ يفوق فكر في واحدة غيرها عشان مش عاجبه الصوره اللي هو بنفسه مع الناس ساهم في أنها تتكون وتبقى ماهى بالشخصية الى قدامنا دى.