غفران العاصي الجزء الثاني
ابتلع الجد غصته واخرج الظرف من احد ادراج مكتبه ووضعه امامه …
الظرف ده وصيه ابوك .. بعد وفاته باسبوع وتحديداً يوم سفرك انا فتحته وعرفت اللي فيه …
ابوك كان كاتب كل فلوسه اللي في البنوك وحصته في المجموعه بالنص بينك وبين اخوك عمر الله يرحمه ومش كاتب لامك ولا مليم …واكد في وصيته ان امك ما تورثش ولا مليم من فلوسه !!!
وبما ان عمر اتوفي مع ابوك في الحادثه فكده كل حاجه اتنقلت لك انتي …
الجزء التاني من الوصيه انك مش هتقدر تستلم ولا قرش من الثروه دي الا ……
الا ايه يا جدي… هتف عاصي بريبه.
صمت الجد قليلاً يتفرس في ملامح وجهه يحاول قرائتها وتابع يضيف برزانته المعتاده …
الا اذا اتجوزت غفران بنت عمك … ولو رفضت الثروه كلها تكون من نصيب غفران….!!!!
هب عاصي من مقعده صارخاً باستنكار: نعععععم!!!
اتجووووزززز!!!
اتجوز غفران يا اما يحرمني من ثروتي !!! وكمان حرم امي من حقها في ورثه !!!!
ده جنان … اكيد حصلت له حاجه في مخه خلته عمل الهبل ده !!!
ولد!!!! انت اتجننت!!!
انت ازاي تتكلم علي ابوك الله يرحمه كده قدامي …
صاح عاصي معتذراً:
انا اسف يا جدي مقصدش .. بس اللي حضرتك بتقوله ده ما يدخلش دماغ عيل صغير…
رمي الجد المظروف في وجهه صائحاً بغضب : اتفضل يا محترم وصيه ابوك اهيه اقراها .. هتلاقيها قبل وفاته بشهر ومتسجله في الشهر العقاري وعلي ايد محامي …
واظن انت كنت كبير وواعي لحاله ابوك قبل وفاته كلن عامل ازاي .. يعني لا كان مجنون ولا فاقد للاهليه علشان تشكك فيه…. امسك عاصي المظروف يفتحه ويقراء ما به وملامح وجهه تزداد قتامه وعبوس….
القي عاصي المظروف علي المكتب واخذ يدور حول نفسه بغضب وجسده ينتفض من شده العصبيه …
مش ممكن ده تخريف … ازاي فكر في حاجه زي كده …
انا وغفران … ازاي …
دي عيله صغيره … دي اختي اللي مربيها … دي زيها زي عمر الله يرحمه…
ازاي ممكن يفكر ان انا ممكن اتجوزها …
وايه المشكله ؟؟؟ هتف الجد ببرود مستفز .
غفران كبرت وبقت عروسه الف من يتمناها .. ثم انا موافق علي كده ومش هلاقي احسن منكم لبعض .. غفران هي اللي هتقدر تصونك وتصون اسمك وتكون ام ولادك ..
وانت الوحيد اللي هتقدر تحميها وتحمي فلوسها …