اميرة الجزء الأول

البارت الأول
بشقة راقيه وبحى راقي كان هناك طفلان يبلغان 10 سنوات بنت وولد وهما توأمان ..وكانت ملامحهما قريبه جداا من بعضهما
اسم الولد هادي و البنت هدي وكانت ملامحهما جميله جدا و شكلهم مرتب ومهندم
كانت هدى قاعدة بترسم فى الاسكتش بتاعها اصلها غاوية رسم وتلوين وبتحبهم جدا لدرجة ان مامتها بتوديها كورسات عشان تنمى هوايتها وموهبتها فى نفس الوقت
وهادى كان معاه كتاب مصور بيقرى فيه وهو كل شوية بيبص على اخته وهى بترسم ويعلقلها على حاجة ويرجع لكتابه من تانى
لكن الملاحظ انهم كانوا بيتكلموا بهدوء شديد جدا وهم فى مكانهم
كانوا فى شهور الصيف واللى بتعتبر الاجازة اللى بيستناها كل الاطفال عشان يقضوها زى ماهم عاوزين
بعد شوية باب الشقة انفتح ودخلت منه أميرة واللى تبقى مامة هدى وهادى كان عندها ٣٥ سنة ست بيت جميلة بيضا وعيونها سودا هى محجبة بس شعرها اسود جسمها ملفوف ماكانتش رشيقة لكن برضة ماكانتش سمينة والاجمل ان صوتها كان هادى زيها كانت رقيقة جدا فى حركتها وكلامها اول مادخلت الولاد قاموا يقابلوها وياخدوا منها الشنط اللى كانت جايبة فيها المشتروات اللى جابتها معاها ودخلوا المطبخ وابتدوا من نفسهم كل واحد مسك شنطة يفضيها ويرتب الحاجات اللى مامتهم اشترتها وأميرة ابتدت تفك طرحتها وهى بتتكلم معاهم وهم بيرتبوا الحاجة
أميرة ها ..عملتوا ايه وانا تحت
هدى انا قربت اخلص الرسمة اللى ابتدتها امبارح بس عاوزة اشترى اقلام رسم الاقلام بتاعتى خلصت ياماما
أميرة خلاص اخر النهار ان شاء الله نبقى ننزل نتمشى شوية ونجيب وانت ياهادى
هادى بابتسامة لا انا لسه شوية لما اخلص الكتب اللى عندى هقوللك
أميرة والاستاذ سليم لسه نايم
هدى لأ ياماما ..سليم صحى بس صمم يفضل فى اوضته على ماحضرتك تيجى من برة
أميرة بتنهيدة ماشى بعد ماتخلصوا اغسلوا ايديكم واقعدوا انتو وانا هاخد شاور بسرعة واجى عشان ابتدى احضر الغدا
هادى بابا اتصل وحضرتك تحت ولما سأل عليكى قلتله انك فى الهايبر ماركيت فقاللى انك اول ماترجعى تكلميه على طول
أميرة ماشى يا حبيبى بس برضة هاخد دش الاول احسن الجو فظيع النهاردة
أميرة دخلت على جوة وهى ماشية خبطت على باب وقالت بمرح أنا جيت ومشيت راحت ناحية اوضتها اخدت هدومها ودخلت اخدت شاور وخرجت راحت على المطبخ وفى ايدها تليفونها
اول ما وصلت المطبخ لقت سليم و ده يبقى اخر العنقود ..عنده سبع سنين بس متعلق بأميرة جدا وبيزعل منها جدا لما بتروح فى اى مكان من غيره فلقته قاعد على ترابيزة المطبخ وهو حاطط ايده على خده أميرة اول ماشافته وطت على خده باسته وهى حاطة التليفون على ودنها وقالت السلام عليكم ايوة يارياض
رياض وعليكم السلام انتى لسه راجعة كل ده فى الماركيت
أميرة بهدوء و رقة ما انت عارف دى نزولة اول الشهر اللى بجيب فيها التموين الاساسى بتاع البيت و
رياض مش مهم مش مهم اسمعى عاوزك تحضريلى شنطة صغيرة عشان مسافر بالليل
أميرة باحباط مسافر فين
رياض هيفرق معاكى يا أميرة المكان حضريلى شنطة وخلاص
اميرة وهى لسه بتحاول تحافظ على هدوئها طبيعة المكان والمدة هيفرقوا يارياض وعلى فكرة مش هتخسر حاجة لما تقوللى
رياض مسافر اربع ايام ورايح الغردقة
أميرة هتحضر اجتماعات رسمى او مقابلات رسمية
رياض سكت شوية وبعدين قاللها ااه تقريبا كل يوم
أميرة بنهيدة ان شاء الله هترجع تلاقيها جاهزة
رياض وأميرة ولاد عم متجوزين من ١٢ سنة عن حب كبير عيلتهم تعتبر من العائلات المستريحة ماديا رياض خريج هندسة وبعد ما اتخرج قرر هو واتنين من اصحابة يعملوا شركة مقاولات صغيرة وشوية بشوية شركة المقاولات كبرت وبقى ليها سمعة تحترم يمكن مش من الشركات اللى تعتبر واكلة السوق لكن من الشركات اللى سمعتها نضيفة
وأميرة خريجة ألسن وكانت متخصصة فى اللغات الشرقية رياض رفض انها تشتغل رغم انها كانت مصممة تشتغل لكن عشان ترضيه قررت انها تشتغل من البيت فكانت بتتعامل مع مكتب ترجمة بيبعتولها الشغل على النت وهى تترجمه وتبعتهولهم من تانى ويادوب كانت بتروحلهم عشان الحسابات المادية كل ماتخلص شغل
أميرة ساندت رياض بكل قوتها وكانت دايما تشجعه وهو كان دايما بيعترف قدام الكل ان الفضل ليها بعد ربنا فى نجاحه .. لأنها موفرة له كل سبل الدعم النفسى للنجاح ده
لكن من سنة فاتت وأميرة ابتدت تحس ان رياض ابتدى يبعد او ينشغل عنها وعن الولاد بزيادة مابقاش مهتم بروتين تجمعهم الاسبوعى اللى كانوا حريصين عليه كل الحرص مهما كانوا مشغولين الا انهم لازم يتجمعوا مع ولادهم فى الويك اند ويعرفوا اخبار بعض ويحلوا مشاكل بعض لو كان فى بقى معظم المرات مسافر مشغول واوقات مالوش مزاج
أميرة فى البداية حاولت تسأله او حتى تشيل عنه لكن لاحظت الطبع الجديد اللى بقى ملازمه فى معظم الاوقات ..الجفا
بقى يتعامل بجفا وبروتينية شديدة حتى فى اوقاتهم الحميمية لدرجة انها اوقات كتير كانت بتحس انه واحشها وهى فى حضنه اللى مابقتش تشبع منه
حضنه بقى مجرد اداء واجب او تفريغ شحنة مش اكتر
كانت عارفة انه داخل مشروع كبير وان المشروع ده كفيل انه ينقل الشركة بتاعتهم نقلة كبيرة جدا وعشان كده قررت انها تسانده حتى لو من بعيد حتى لو مساندتها دى انها ماتحسسهوش انه مقصر معاها ومع الولاد
ولسه بتحاول لان المشروع قبل ما يخلص كان ابتدى مشروع اكبر وابتدى ينشغل عنهم اكتر واكتر ولما حست ان الفجوة بتوسع قررت انها لازم تتكلم معاه
ولما اتكلمت معاه ماطلعتش باى نتيجة اكتر من انه سمعها واعتذرلها عن تقصيره ووعدها انه يرجع زى ماكان لكن قبل ما يكمل الاسبوع رجعت ريما لعادتها القديمة
وبعد كده لما بقت تعاتبه بقى بدل ما يعتذر .. بقى يتريق وساعات كمان يتنرفز عليها
ابتدت تاخد دورها و دوره وطبعا ده مضايقها جدا ومضايق الولاد لكن بطبيعة الحال بتحاول تلاقيله الف عذر قدام الولاد
بعد ما قفلت التليفون مع رياض بصت لقت سليم لسه باصصلها وهو زعلان فابتسمتله وقالت الولاد الحلوين ماينفعش يزعلوا من مامتهم
سليم بزعل والامهات الحلوين مايخرجوش من غير ولادهم
أميرة بس انا ماخرجتش انا كنت بشترى طلبات البيت وانت عارف انى ببقى ملخومة بالشنط اللى ببقى شايلاها ومابعرفش اخد بالى منك
سليم مانا كان ممكن استناكى فى العربية
أميرة لا طبعا ماينفعش وعلى فكرة كان ممكن اخد حد من اخواتك معايا بس مارضيتش عشان انت لما تصحى تلاقيهم هم الاتنين معاك
هادى جه من برة وقاللها ماما هو بابا مسافر تانى انا سمعتك بتتكلمى عن تحضير شنطة
أميرة وهى بتحاول تبقى عادية ومايبانش عليها انها متضايقة ايوة ياحبيبى مسافر بالليل ان شاء الله
هادى وهيقعد اد ايه
أميرة بيقول اربع ايام
هادى معنى كده انه ممكن مايسافرش معانا زى ما وعدنا
أميرة بتفكير ماسألتوش ياهادى
هادى طب عاوزين نعرف
أميرة لما ييجى ياحبيبى ان شاء الله نبقى نسأله
أميرة ابتدت تحضر الغدا وبعد ماخلصت دخلت اخدت شاور تانى وغيرت هدومها وابتدت تحضر الشنطة لرياض وبعد ما خلصت كان معاد رجوعه من الشركة بس اتاخر عن معاده
—
واللى بقى طبيعى وعادى بالنسبة لأميرة وللولاد كمان فكلمته تسأله عن سبب تأخيره فرد عليها باختصار شديد جدا معلش يا أميرة انا هعدى من تحت خلى البواب ينزللى الشنطة
أميرة باستنكار مش هتطلع حتى تسلم على الولاد
رياض معلش سلميلى انتى عليهم عشان ما اتأخرش على الطيارة
أميرة باحباط طب هادى كان عاوز يكلمك
رياض بتنهيدة ماشى هاتيه
هادى اخد التليفون من اميرة وقال أيوة يا بابا ازيك
رياض باستعجال ايوة ياهادى خير ياحبيبى
هادى كنت عاوز اسأل حضرتك ان كنت هتسافر معانا زى ما وعدتنا
رياض وهو بينفخ انا عندى شغل مهم ياحبيبى وانتم ماما معاكم .. وخلى ماما تنده للبواب ياخد الشنطة احسن هتأخر ياللا سلام
هادى ناول التليفون لأميرة وقاللها خلى البواب ينزل له الشنطة وسابها وراح قعد فى مكانه زى ماكان
اميرة مابقيتش عارفة تعمل ايه بس ندهت على البواب اديتله الشنطة ووقفت ورا الشباك لحد ماشافت عربية رياض جت تحت العمارة والبواب حطله الشنطة فى شنطة العربية بس لما رياض مشى بالعربية لمحت طفلة صغيرة عمرها حوالى خمس سنين قاعدة فى العربية من ورا
أميرة استغربت جدا لانها عارفة ان الطفلة دى بنت شهيرة صاحبتها واللى اتوسطتلها انها تشتغل فى شركة رياض من حوالى سنتين بعد ما جوزها اتوفى وكانت حالتها المادية مش اد كده و رياض وافق واخدها اشتغلت فى السكرتارية بس ايه اللى جاب بنت شهيرة فى عربيته وخاڤت لا تكون شهيرة حصللها حاجة ورياض ما اهتمش انه يبلغها فقررت تتصل بيها تتطمن عليها لكن لما كلمتها .. مارديتش عليها من اول مرة لكن لما ردت عليها بعد كده
شهيرة ايوة يا أميرة ازيك يا روحى وحشتينى
أميرة لاحظت ان شهيرة صوتها كويس فاتكلمت عادى وقالتلها ازيك انتى ياشهيرة اخبارك أيه
شهيرة انا بخير ياروحى انا عارفة انى مقصرة معاكى بقالى فترة بس معلش سامحينى ..اصل جودى كانت تعبانة بقالها فترة
أميرة مالها سلامتها
شهيرة ها .. يعنى كانت بتلخبط فى الاكل ومعدتها ماكانتش مظبوطة
أميرة طب وعاملة ايه دلوقتى
شهيرة أحسن الحمدلله وأدينا مسافرين يومين كده عشان نغير جو
أميرة بفضول طب كويس مسافرين فين
شهيرة سكتت شوية وبعدين قالتلها مسافرين شرم يا أميرة
أميرة وهتقعدوا اد ايه
شهيرة يعنى حوالى اسبوع كده
أميرة انتى واخدة اجازة على كده
شهيرة بلخبطة ااه لا .. اصل هو انا ماقلتلكيش
أميرة خير
شهيرة أصل انا سبت الشغل
أميرة باستغراب ماقلتيليش يعنى من امتى وليه
شهيرة سمعت صوت جرس الانتركوم عند شهيرة فشهيرة قالتلها بسرعة استنى يا اميرة خليكى معايا وحطتها على الهولد دقيقة ورجعت قالتلها معلش بقى يا أميرة هضطر اسيبك احسن كنت طالبة اوبر ومستنينى تحت عشان يوصلنى المطار هبقى اكلمك بعدين سلام ياروحى
أميرة بعد ما قفلت مع شهيرة حست ان فى حاجة مش مظبوطة لما هى مسافرة شرم ..بنتها كانت بتعمل ايه فى عربية رياض وليه ماقالتلهاش وهل صدفة ان هم الاتنين مسافرين فى نفس التوقيت
الافكار ابتدت توديها وتجيبها ولاول مرة فى حياتها تشك فى رياض كتير كانت بتغير عليه لكن عمرها ماشكت فيه قبل اللحظة دى
أميرة فضلت قاعدة فى مكانها شوية وهى ماسكة تليفونها وسرحانة وبعدين رفعت التليفون تانى واتصلت برياض وانتظرته يرد عليها وانتظارها طال لدرجة انها كررت محاولتها من تانى وقبل الجرس ماينتهى سمعت صوته وهو بيقوللها بنفاذ صبر ايه يا اميرة ما انتى عارفة انى سايق
أميرة بهدوء شديد هو انت مين معاك فى العربية يارياض
رياض بارتباك يعنى ايه مين معايا ماحدش معايا انتى تقصدى ايه يا أميرة
أميرة وهى على نفس هدوئها انا سؤالى واضح يارياض
رياض ببعض الحدة ماقلتلك ماعييش حد
أميرة بانتباه شديد جدا بنت شهيرة معاك فى العربية بتعمل ايه يا رياض
أميرة سمعت فرملة شديدة جدا وشهقة خفيفة عارفة صاحبتها كويس وشبه أنين مكتوم واللى حست انه صوت جودى
أميرة بانزعاج رياض .. انت كويس حد حصل له حاجة .. رياض رد عليا
رياض بلخبطة أيوة أيوة يا أميرة الحمدلله مافيش حاجة أميرة انا هضطر اقفل معاكى
أميرة بعد ما اتطمنت انه بخير رياض لو سمحت عوزاك فى البيت دلوقتى
رياض بلجلجة أميرة انتى عارفة ان عندى طيارة وناس مستنيانى
أميرة وأنا كمان مستنياك ولوحبيت تجيب ضيوفك معاك اهلا وسهلا
أميرة قالتله اللى قالته وقفلت السكة ما استنتش تسمع منه اى حاجة
وقامت راحت ناحية ولادها وقالتلهم بابتسامة ها تحبوا تقضوا الليلة دى عند تيتا وجدو
سليم وهو بيسقف ااه يا ماما جدو وتيتا وحشونى
أميرة طب ياللا البسو بسرعة هخلى خالو ادهم ييجى ياخدكم حالا وانا عندى حاجة مهمة هخلصها واحصلكم
سليم خلاص هستنى معاكى
أميرة بحزم لا ياحبيبى مش هينفع اللى ورايا ده حاجات كبار ماينفعش تبقى معايا فيها ياللا البسو بسرعة
هادى طب حضرتك مش محتاجانى معاكى
أميرة لا ياحبيبى محتاجاك تاخد بالك من اخواتك على ما اجيلكم
الولاد راحو يلبسوا وأميرة اتصلت باخوها واللى ساكن مع ابوها وامها فى نفس العقار واللى يبعد عنها بخمس دقايق بس بالعربية وطلبت منه ييجى ياخد الولاد يوديهم لباباها ومامتها بسرعة لان عندها حاجات مهمة عاوزة تخلصها
وفعلا فى خلال نص ساعة كانت أميرة لوحدها فى البيت ومستنية تشوف رياض هيعمل ايه
انتظارها طال عدت ساعة واتنين وهى مستنية لدرجة انها يئست وفهمت ان رياض ضړب بكلامها عرض الحائط وقرر انه يكمل سفره
فضلت قاعدة مكانها وهى لابسة اكنها خارجة وفضلت تحط كل الاحتمالات فى مخيلتها ياترى اللى حصل النهاردة له علاقة بتغيير رياض طول الفترة اللى فاتت
ياترى سفر رياض كان فعلا شغل واللا مسافر لغرض تانى وايه اللى جاب جودى معاه
وليه شهيرة ماجابتلهاش سيرة ان بنتها مع رياض وليه رياض ماقاللهاش وفوق ده كله ايه طبيعة العلاقة اللى بين جوزها و شهيرة
لما الوقت طال عليها قررت تقوم تروح لولادها وتفكر على مهلها فى كل ده لكن قبل ما تروح ناحية الباب سمعت الباب بيتفتح التفتت بسرعة لقت رياض داخل وعلى وشه نوع من الجمود فضلت بصاله وهى مستنياه يقفل الباب وراه لكن لقت جودى داخله وراه وشهيرة مسكاها من كتفها وماشية وراها اكنها بتتحامى فيها وبصة فى الارض
اول ماجودى شافت أميرة جريت عليها وحضنتها وقالتلها طنط ميرا وحشتينى
أميرة وطت على جودى باستها وقالتلها برقة وانتى كمان ياحبيبتى وحشتينى كده برضة ماتسأليش عليا كل ده
جودى ببراءة كل ما اقول لماما وعمو رياض يقولولى انك مسافرة
أميرة رفعت عينها بصت لرياض بنظرة ماقدرش يعرف مغزاها و شهيرة بصت لأميرة تدور على عيونها لكن أميرة مابصتلهاش وراحت قعدت على كرسى واخدت جودى على رجلها وقالتلها عموما ياحبيبتى ماتزعليش
جودى اومال فين سليم ياطنط
أميرة سليم مش هنا ياحبيبتى لو تحبى تدخلى تلعبى فى اوضته روحى بس من غير ماتبهدلى حاجة
جودى بطفولة مش هبهدل هلعب بالراحة
جودى راحت ناحية اوضة سليم وأميرة فضلت قاعدة مكانها وبصت لسليم وشهيرة اللى لسه واقفين مكانهم وقالتلهم بجمود واقفين ليه ماتستريحوا
رياض اول ما اتكلم قاللها انتى عرفتى منين
أميرة لما سمعت الجملة دى قلبها انقبض وعرفت على طول ان فى حاجة وحاجة كبيرة كمان فقررت
—
انها تسمع وتسمع وبس فبصتلهم وسكتت
شهيرة انا مش عاوزاكى تفهمى حاجة غلط يا أميرة انا ورياض مافيش بيننا حاجة وحشة لاسمح الله احنا متجوزين
رياض بصوت عالى شهيرة
شهيرة بدفاع عن نفسها لازم تعرف اننا مابنعملش حاجة غلط لا تكون فاكرة اننا على علاقة ببعض كده وخلاص
رياض پغضب اسكتى دلوقتى
رياض رجع بص لأميرة وهو بيحاول يفهم رد فعلها على اللى سمعته فلقاها بصتله وقالت من امتى
رياض اميرة انتى عارفة طبعا انى من وقت ..
أميرة من امتى
رياض بتنهيدة من سنة تقريبا
أميرة بهدوء شديد كنتم مسافرين فين يارياض
رياض سكت وماجاوبش فبصت لشهيرة وقالتلها مسموحلك تجاوبى مكانه
شهيرة قالت بلجلجة بعد ما رياض بصلها بصة تحذير كنا رايحين دهب
أميرة بانتباه ليه
شهيرة وهى بتنقل عيونها بين أميرة ورياض رياض كان عازمنى نقضى اسبوع هناك بمناسبة عيد ميلادى
أميرة ابتسمت ابتسامة واسعة وقالتلها صحيح ده انتى عيد ميلادك بعد بكرة كل سنة وانتى طيبة
رياض استغرب جدا رد فعلها ده وابتدى يقلق من تصرفاتها فقعد يبصلها وهو مركز مع كل رد فعل ليها واللى لقاها فجأة قالت لشهيرة بكل هدوء بعد اذنك .. ياريت تاخدى جودى و تروحوا او تروحوا مكان مانتوا عايزين لان رياض حاليا مش فاضى يروح معاكم فى اى مكان وماتقلقيش .. هيبات فى حضنك ومااعتقدش انه هيبعد عنه تانى
شهيرة قامت وقفت وهى باصة لرياض وبتحاول تعرف رد فعله على كلام أميرة فلقته ساكت ومركز مع اميرة ولما اميرة لقتها فضلت مكانها ماتحركتش رجعت قالتلها ياللا يامدام شهيرة خلصى بسرعة من فضلك .. انا مش فاضية
شهيرة قامت بسرعة من مكانها حتى من غير ماتبص لرياض و ندهت على بنتها واخدتها ومشيت فورا وقفلت الباب وراها
الهدوء ساد المكان لفترة من الوقت و أميرة مركزة بصرها على ملامح رياض اكنها بتدور فيهم على حاجة ومش لاقياها يمكن بتدور على حبهم زمان او بتدور على سنين عمرهم اللى فجأة حست انهم ضاعوا منها ومش لاقياهم رياض كان طول الوقت من اول ما شهيرة مشيت وهو باصص فى الارض مش قادر يواجهها او خجلان من روحه لكن لما الوقت طال رفع عينيه لقاها بصاله لكن كانت على نفس هدوئها ولما عينيهم اتلاقت كان متوقع ان عيونها هتبقى مليانة ڠضب لكن لقى عيونها بصاله وهى فيها سكون غريب بدل ماهى اللى تتكلم هو اللى اتكلم وسألها الولاد عرفوا
أميرة لسه
رياض ناوية على ايه
أميرة ناوية اسمعك
رياض باستغراب مش فاهم تسمعى ايه
أميرة اسمع اسبابك اللى خلتك تعمل كده مش هقول اسباب خېانتك لانى مش عاوزة اسميها خېانة بس سيبك من المسميات دلوقتى خلينا فى الحقايق احكيلى .. انا سمعاك وحاول تنسى انى مراتك وانت بتحكى اتكلم براحتك وطلع كل اللى جواك
رياض مابقاش عارف يقوللها ايه بالظبط بس فى الاخر اضطر يتكلم فقاللها انتى عارفة ومتأكدة انى بحبك والكل شاهد على حبنا انا عمرى مابصيت لاى واحدة غيرك وكنتى دايما فخر ليا قدام الكل
لما طلبتى منى من سنتين انى اشغل شهيرة عندنا فى الشركة وحكيتيلى ظروفها صعبت عليا وخليتها قريبة منى عشان اقدر اراعيها وفى نفس الوقت ماحدش يضايقها بس شوية بشوية بحكم وجودنا مع بعض كل يوم قربنا من بعض
هطأميرة برضة ماقلتليش ليه
رياض ببوادر ڠضب هو ايه اللى ليه مش فاهم
أميرة لقيت فيها ايه مش موجود فيا
رياض بتنهيدة الحكاية مش كده يا أميرة الحكاية
أميرة بتصميم لكن برضة بهدوء لقيت فيها ايه يارياض
رياض بقلة حيلة شهيرة نشيطة وعندها حيوية وطاقة بتتكلم بانطلاق اللى عاوزاه بتاخده ماعندهاش خنوع دايما عندها مقدرة انها تخلينى اثور واتمرد دايما بتدينى احساس ان لسه جوايا طاقة ماضاعتش وانى لسه قدامى كتير اوى عشان احققه
رياض قام وقف وابتدى يتحرك فى المكان حواليها وهو بيتكلم وكمل وقال ..
لكن انتى يا اميرة انتى بقيتى باردة زيادة عن اللزوم هدوئك بقى يستفذنى وينرفزنى بقيتى تحبطينى وتهمدى عزيمتى كل حاجة بتاخديها ببساطة زيادة عن اللزوم برودك بقى يستفذنى ويغيظنى وعارف ان ماينفعش تتغيرى لان ده طبعك وعمره ماهيتغير
اميرة بسخرية هدوئى اللى كنت مسميه رقة وبتقول فيه اشعار بقى برود
رياض زهقت من الهدوء زهقت من الركود يا اميرة كنت محتاج حاجة تغير الماية الراكدة حاجة تغير الروتين الممل اللى بقينا نبات ونصبح فيه حتى الولاد بقوا نسخة منك بقوا باردين زيك بقيت وانا قاعد وسطكم حاسس انى وسط تماثيل من الشمع مافيش حرارة بقيت على طول حاسس بالاحباط وانا جانبك
أميرة بابتسامة باردة فقررت انك تعيش حياتك بالاثارة اللى بتتمناها بعيدا عن برودى واحباطى ليك
رياض باستدراك مش بالظبط كده بس انتى ..
أميرة قاطعته وقالت برضة بكل هدوء حبتها
رياض بخجل مش الحب اللى فى بالك بس .
أميرة تبقى حبيتها
ياض اسمعى يا أميرة انتى مراتى وبنت عمى وحبيبتى و
أميرة قامت وقفت واخدت شنطتها وراحت ناحية باب الشقة فرياض قام وراها ومسكها من كتافها وقالها بزعيق انتى رايحة فين
أميرة اتاخرت على الولاد وعاوزة اما ارجع ما الاقيش اى حاجة تخصك تفضل موجودة هنا فى بيتى
رياض پغضب انتى بتقولى ايه انتى اتجننتى ده بيتى وبيت ولادى وانتى مراتى
أميرة التفتتله وبصتله فى عينه بقوة وقالتله بنوع من التحدى وقت ماتحب تشوفهم اهلا وسهلا بس بمعاد مسبق واعتقد انك زهقت بما فيه الكفاية من بيت تماثيل الشمع
رياض پغضب اكبر ماتنرفزينيش اكتر من كده يا أميرة واتكلمى كلام ناس عاقلين
اميرة بتنهيدة حاضر هكلمك كلام ناس عاقلين اولا .. انا طالبة الطلاق ثانيا ..الولاد كلهم فى حضانتى بالتراضى او بالقانون ثالثا .. انا بتمنى اننا نتعامل مع بعض بتحضر على الاقل عشان خاطر الولاد
رياض بذهول هو انتى عرفتى ازاى وامتى وازاى انتى بالبرود ده
أميرة بابتسامة تهكم عرفت من مراتك لما جيتولى مع بعض دلوقتى لكن شكيت لما شفت بنتها معاك فى العربية وقت ماجيت تاخد الشنطة اما بقى حكاية البرود اللى مضايقك ده فمعلش هحتفظ باسبابه لروحى
رياض كان واقف بيسمعها وهو هيشد فى شعره بس قاللها پصدمة يعنى انتى لما كلمتينى وطلبتى منى انى اجى واجيب اللى معايا ماكنتيش تعرفى حاجة
أميرة بابتسامة سخرية تخيل ايوة بس كتت يادوب ابتديت انى اشك
رياض وانتى ناوية تقولى لولادك ايه لما يسألوكى عن سبب انفصالنا اللى انتى عاوزاه
أميرة وقفت ثوانى وهى بصاله فى عينيه وقالت له ما اعتقدش انه هيفرق معاك اللى هقوله لولادك اللى فضلت انك تحتفل بعيد ميلاد مراتك اللى فى السر مع بنتها صاحبة ولادك عن انك تقضى معاهم كام يوم من اجازتهم اللى ماقضيتش معاهم فيها ولا ساعة بس الاكيد انى مش هكذب هقوللهم الحقيقة ماتقلقش
رياض وهو بيشدها پعنف من ايدها اوعى تكونى فاكرة انى هسيبك تسممى افكار ولادى من ناحيتى واللا تكرهيهم فيا يا أميرة
أميرة وهى بتشيل ايده من على دراعاتها يعنى انت شايف ان الحقيقة هتشوه صورتك قدام ولادك
رياض پغضب ماتقولينيش كلام انا ماقلتوش وطلاق مش هطلق يا أميرة حطى كلامى ده
—
حلقة فى ودنك
أميرة بتصميم لكن برضة من غير ماتعلى صوتها هتطلقنى يا رياض وهتسيب البيت وخلينا نبقى متحضرين افضل ليك صدقنى لانك لو فكرت مجرد تفكير انك ماتنفذليش كلامى ده هتضطرنى انى ادخل بابا وعمى فى الموضوع فبلاش الموضوع يكبر عن ماهو كبير اصلا
رياض قرب منها وقالها بتصميم اكبر وهو مقرب وشه منها عارفة لو دخلتى الامم المتحدة .. برضة مش هطلقك يا أميرة واعلى مافى خيلك اركبيه
البارت التانى
رياض خلص كلامه وسابها وخرج و رزع الباب وكان ده بمثابة اذن ليها ان
الهدوء اللى كانت مستخبية وراه يقع رمت نفسها على الكرسى وهى بتبكى باڼهيار وۏجع على ضياع حبها وعمرها
كانت بتبكى وشريط حياتها بيمر من قدامها حبهم لبعض من ايام ثانوى و
مغازلته ليها ولخجلها وهدوئها ورقتها اللى وصفه بعد السنين دى كلها بالبرود
افتكرت اول جوازهم و أد ايه كان الكل بيحسدهم على سعادتهم و أد ايه كان دايما بيقول فيها قصايد شعر للكل وقدام الكل من غير خجل ولا كسوف
افتكرت تصميمه على حضورها معاه وجنبه فى كل المناسبات اللى تخص شغله لغاية سنة فاتت بقى يحضر لوحده من غير حتى مايطلب منها ولا يسألها رأيها
افتكرت لما سألته عن سبب مرواحه لوحده و رده عليها بانه مش عاوز يتعبها او مش عاوز يشغلها عن الولاد او انه مش هيقعد كتيرولا هيتأخر فى الحفلة رغم انه كان بيتأخر دايما
غبية يا أميرة غبية جوزك بعد عنك خطوة بخطوة وانتى عمالة تحطيله اعذار ورا اعذار بدل ما تعرفى ان فى واحدة غيرك اخدت مكانك فى قلبه وحياته خدتى انتى مكانه فى الاوقات اللى كان لازم يقضيها معاكى ومع ولاده
غبية يا أميرة ما اتعلمتيش حاجة من التاريخ و روحتى سلمتى جوزك بايدك لاعز اصحابك صاحبتك اللى كانت دايما تعترف انها بتغير من علاقتك بجوزك سلمتيهولها على طبق من الماظ
ليه الغدر ليه مافكروش فيا لحظة واحدة ماعملوش حسابهم انى هييجى وقت ولازم هعرف مافكروش الوضع ساعتها كان هيبقى ازاى
أميرة لقت نفسها من كتر العياط قربت ټنهار فقررت تقوم تروح لولادها فدخلت غسلت وشها وحاولت انها تبان طبيعية على اد ما قدرت ونزلت اخدت عربيتها وراحت لبيت باباها
رياض لما نزل من عند أميرة كان فى قمة غضبه غضبه كان من نفسه لانه ماحسبش حساب اللحظة دى من البداية و لانه اتسرع وكشف نفسه بنفسه من غير اى سبب لقى نفسه كان عامل زى اللى على راسه بطحه ..فماشى باستمرار وهو ايده عليها وڠضب من طلب أميرة الانفصال وڠضب من تسرع شهيرة لما قالتلها على كل حاجة
كان ڠضبان من الدنيا كلها وناقم على الدنيا كلها بعد ما قعد فى عربيته شوية دور العربية وراح على البيت اللى اشتراه لشهيرة بعيد عن شقتها القديمة عشان ماحدش يعرف عنهم حاجة
البيت كان عبارة عن فيلا صغيرة من دورين بجنينة صغيرة لكن كان منظرها بينم عن مستوى عالى وانيق جدا
رياض وصل وركن عربيته فى الجراج الخاص للفيلا وراح ناحية الباب فتحه ودخل لقى هدوء شديد جدا اكن الفيلا فاضية راح ناحية اوضة النوم لقى شهيرة قاعدة فى السرير ماسكة الموبايل فى ايدها بتقلب فيه واول ماشافته رمت الموبايل من ايدها وقامت بسرعة تقابله وقالت له بلهفة ها يا رياض عملت ايه واتفقت معاها على ايه
رياض بنوع من الزهق ششششششش مش عاوز كلام كتير ياشهيرة ارجوكى وسيبينى فى حالى
شهيرة طب على الاقل قوللى هى عرفت منين
رياض بنرفزة السؤال مايبقاش كده السؤال يبقى عرفت بسبب مين عرفت بسببك ياهانم انتى اللى صممتى انى اخد جودى معايا عشان تعرفى تلبسى وتجهزى الشنط بهدوء وانا كمان غبى ازاى ماعملتش حسابى انها ممكن تشوفها فى العربية واهى شافتها وربطت كل الخيوط فى بعض وكملناها بغبائنا لما روحنالها سوا
شهيرة بدهشة انت عاوز تفهمنى ان أميرة ماكانتش تعرف قبل النهاردة
رياض بسخرية تصورى
شهيرة باستياء عموما كان مسيرها تعرف النهاردة بقى بكرة بعد سنة كان لازم هتعرف والحمدلله انها عرفت
رياض باستغراب انتى مبسوطة انها عرفت
شهيرة ببساطة مش مبسوطة بس مستريحة وياما قلتلك من الاول انها لازم تعرف وانت اللى كل يوم كنت بتطلعلى بحجة شكل واهى جت من عند ربنا قول الحمدلله
رياض انتى بتحمدى ربنا على خړاب بيتى على ان اميرة طلبت منى الطلاق وعاوزانى اخرج برة بيتها وحياتها كلها
شهيرة بتحذير اوعاك تحود الدفة عليا يارياض نسيت ان انت اللى فضلت ورايا على ماوافقت اتجوزك فاكر لما قلتلك انت راجل متجوز وبتحب مراتك فاكر قلتلى ايه فاكر اما قلتلى ان حبك لاميرة ماټ من زمان بس انت اللى ماكنتش واخد بالك فاكر اما قلتلى انك عاوز تطلقها بس خاېف على زعل ابوك وعمك طب اهى هى النهاردة اللى طلبت ده ايه بقى ناوى على ايه بالظبط
رياض كان واقف بيسمع كلام شهيرة وهو زى اللى مصډوم هو فعلا قال الكلام ده بس هل كان فعلا يقصده هل فعلا حب اميرة ماټ جواه واللا كان مجرد كلام عشان يقنع شهيرة توافق تتجوزه
هل كان عنده فعلا استعداد انه يطلقها طب ليه ثار واټجنن لما سمعها النهاردة بتطلب الطلب ده بنفسها
رياض بص لشهيرة بقلة حيلة وسابها وراح على اوضة جودى لقاها نايمة فى سريرها رياض دخل بشويش عدل عليها الغطا وباس راسها وسابها وخرج راح على اوضة المكتب بس وهو بيفتكر امتى اخر مرة عمل كده مع سليم او حد من اخواته اكتشف ان من يوم ما اتجوزشهيرة كان كل اهتمامه بجودى وبس كان عاوز يثبتلها انه هيبقى لها اب بدل ابوها اللى ماټ وسابها وهى حتى ماتفتكرش شكله لكن اكتشف انه فرغ كل مخزون ابوته معاها من غير مايفضل عنده اى احتياطى لولاده اللى من صلبه
كان مسافر يحتفل بعيد ميلاد شهيرة واللى بالصدفة البحتة يبقى يوم عيد جوازة من أميرة لكن هو قرر يحتفل بعيد ميلاد شهيرة بس لانها هددته انها هتزعل منه زعلة كبيرة لو ما احتفلش بعيد ميلادها السنة دى واتغاضى عن عيد جوازه بأميرة لانه كان عارف ومتأكد ان أميرة هتعذره لو نسى ويمكن كمان تجيبله هديه تعوضه عن انشغاله عنها وعن ولادهم بس ياترى هو بجد مابقاش يحب أميرة لازم يعرف هو هيقدر يستغنى عنها بجد واللا لا قاللها انه لايمكن يطلقها رغم انه عارف كويس ان لو ابوه وعمه اتدخلوا هيخلوه يطلقها فى ثوانى
بس هو عاوز ايه عاوز أميرة واللا عاوز شهيرة عاوز الماية واللا الڼار لازم يعرف عشان يقدر ياخد قرار
رياض نام مكانه على كنبة اوضة المكتب نوم مقطع بقلق كان كل شوية يفتح عينه وهو مستغرب المكان حواليه وبعدين على مايستوعب ويفتكر يرجع يروح فى النوم من تانى
كل ماكان ينام كان بيشوف احلام وهلاوس كتير مابين أميرة وشهيرة وما بين جودى وولاده
كان بيشوف ولاده زعلانين منه وكان بيشوف أميرة على نفس هدوئها وهى بتتفرج عليه وعلى حيرته وشهيرة
—
بتحاول تشده من قدام أميرة وبتزقه بعيد عنها
رياض قام على صوت آذان الفجر قام اتوضى وقرر يروح يصلى فى المسجد وبعد ما استعد للصلاة قرر يروح يصلى فى المسجد اللى جنب بيت أميرة ركب عربيته وراح على هناك ووصل بسرعة بسبب خلو الشوارع فى الوقت ده دخل المسجد صلى الفجر وفضل فى المسجد شوية وبعد كده راح على شقة أميرة ودخل وهو فاكر انه هيلاقيها موجودة لكن اتفاجئ انه مالقهاش وفهم انها باتت عند عمه
دخل على اوضة نومهم لقاها مترتبة جدا زى باقى البيت وزى عادة اميرة اللى دايما حياتها منظمة جدا من برة ومن جوة
سمع صوت العصافير بتوعها فى البلكونة ففتح باب البلكونة وقعد يتفرج على العصافير وهو بيفتكر اول عصفور عندهم لما اميرة لقته مجروح وواقع فى بلكونتهم وكانت بتقعد ټعيط جنبه لما كانت تحس بوجعه وفضلت تعالجه لحد اما خف وبعدين قررت تجيبله قفص كبير ووليفة و دى كانت البداية البلكونة اتملت عصافير لدرجة ان اميرة كانت بتهادى بيهم اصحابها واصحاب الولاد
رياض وقف يتفرج عليهم شوية على نور الصبحية اللى ابتدى يشقشق وبعدين حطلهم اكل وماية ورجع دخل وقفل البلكونة من تانى
وهو خارج شاف على الحيطة لوحة التقييم بتاعة ولادة كانت اميرة معلقة على الحيطة فى الطرقة لوح ابنوس ابيض عملاه زى السبورة ورسمة عليه جدول باسامى الولاد وكل واحد فيهم له خانتين ..خانة اللايك وخانة الديس لايك وكانت كل اسبوع تجمعهم وتراجع معاهم كل واحد عمل ايه كويس وايه وحش
رياض وقف شوية قدام البورد وبعدين فجأة راح ناحية مكتبه وطلع لوحة كبيرة من اللوح اللى بيستعملهم فى رسم المشاريع وثبتها على حامل الرسم بتاعه وقسمها بالقلم نصين وكتب على نصها اميرة وعلى النص التانى شهيرة
وابتدى يسجل ميزات وعيوب كل واحدة فيهم بالورقة والقلم ابتدى بأميرة وابتدى بميزاتها لقى نفسه عدى عليه ساعة كاملة وهو بيكتب فى ميزات ليها ولسه ماخلصش فقرر يسيب الميزات ويكتب العيوب ..فكتب فى عيوبها بتطفى غضبى وثورتى بسرعة
بعد ماكتب الجملة دى بصلها شوية وبعدين اتنهد وشطبها ورجع كتبها من تانى فى المميزات وقعد يفكر فى عيوب أميرة لقى انه مش لاقيلها عيوب وحتى لما قاللها انه بقى يشوفها باردة كان مجرد بيلاقيلها حجة يدارى بيها اللى عمله
فراح عند خانة المميزات بتاعة شهيرة وكتب .. مچنونة دايما بتحسسنى بالحيوية والنشاط بتخلينى احس انى عايش
لما كتب الكلام ده سأل نفسه سؤال طب هو انت ماكنتش بتحس بده مع أميرة وولادك
رجع من تانى يكتب فى مميزات شهيرة فكتب .. دايما متطلعة ومابتستكفيش
رياض سكت شوية وبعدين رجع شطب اخر جملة وحطها فى عيوب شهيرة مش مميزاتها لان طبعها ده كان دايما بيضغط على اعصابه واتسبب انه بالفعل اهمل أميرة وولاده
رياض قعد يتفرج على اللوحة لقاها مليانة بمميزات لأميرة وماقدرش يذكر لها اى عيوب رغم انه اكيد ليها عيوب بس افتكر انه طول عمره بيحبها على بعضها بكل اللى فيها وعليه
ولقى شهيرة الناحية بتاعتها تكاد انها تكون فاضية طب فين مميزات شهيرة اللى خلته يسيب بيته ويجرى وراها ليه دلوقتى مش قادر يشوف ده ولا يحس بيه
رياض مد ايده ونزع اللوحة من على الحامل واخدها فى ايده ومشى نزل حط اللوحة فى العربية وراح على بيت شهيرة
اول ماركن العربية سمع صوت شهيرة عالى وهى بتزعق لجودى وبتنده عليها بصوت عالى
لما دخل سألها بتزعقى ليه
شهيرة بعصبية من الصبح مجننانى بالالوان اللى مبهدلة بيهم الدنيا دى
رياض ماقلتلك اعمليلها مكان تحط فيها الالوان بتاعتها وتقعد ترسم فيه من غير خناقة كل يوم دى
شهيرة پغضب دى عيلة خمس سنين ركن ايه ده اللى هعملهولها تقعد فيه
رياض هدى كانت اصغر منها لما أميرة عملت كده معاها وشوية شوية اتعلمت واخدت على كده
شهيرة بسخرية أميرة قلتلى
رياض بتتريقى على ايه انا مش فاهم تقصدى ايه
شهيرة اقصد انى مش هبقى نسخة تانية من حد يارياض
رياض وانا ماطلبتش ده
شهيرة بس بتلمح لده وانا مش هعمل كده
رياض شهيرة لاحظى ان كل الاوتار مشدودة فبلاش تشديها بزيادة مش وقته
شهيرة بنرفزة لا وقته مش كفاية امبارح كنت بتلومنى انا على اللى حصل ده بدل ماتقول كتر خيرك انى وافقت انى اعيش فى الضل سنة بحالها لمجرد انك خاېف على شعور البرنسيسة بتاعتك
رياض بدهشة انا عمرى ماسمعتك بتتكلمى عن اميرة بالطريقة دى انتى ايه اللى جرالك
شهيرة وهى لسه متنرفزة اللى جرالى انى زهقت انا ايه اللى بجبرنى انى اعيش فى الضل طول عمرى انا ماصدقت انها عرفت خلينا نعيش فى النور بقى لا انت اول ولا اخر راجل تتجوز على مراتك ياما رجالة متجوزين اكتر من واحدة ومراتاتهم عارفين وعايشين مع بعض عادى طالما مقتدر ماحدش له عندك حاجة ده انا كنت منتظرة اليوم ده بفروغ الصبر
رياض پصدمة تقصدى انك كنتى متعمدة تخلينى اخد چودى معايا فى العربية وانا رايح البيت .. كنتى قاصدة انها تشوفها
شهيرة بارتباك لا طبعا بس اقصد الحمدلله انها جت من عند ربنا وماتقعدش بقى تعمللنا حكاية
رياض أميرة طالبة الطلاق
شهيرة وهى بتديله ضهرها هى حرة .. طلقها مش هى اللى عاوزة كده
رياض وولادى
شهيرة لفتله تانى وراحت وقفت وراه وحطت ايديها على اكتافه وقالتله ولادك هيفضلوا طول عمرهم ولادك مافيش حاجة هتتغير وطالما اميرة عرفت فانا دلوقتى من حقى انى احمل واخلف واجيبلك طفل واتنين كمان انا كمان ليا حق فيك يارياض ومن حقى ان يبقى ليا ولاد منك ويبقى ليهم حق فيك وفى مالك زى ولادك من أميرة بالظبط
رياض كان بيسمعها وهو مش عارف يعمل ايه ولا يرد عليها بايه بس فضل يتأملها شوية كأنه أول مرة يشوفها او يتكلم معاها ولما سابها وراح ناحية مكتبه قالتله رايح على فين مش هتفطر
رياض رايح اشوف ممكن اعمل ايه لما الحړب تقوم
شهيرة باستغراب تقصد ايه
رياض بسخرية انتى فاكرة ان ابويا وعمى ممكن يسيبوا الشركة فى ايدى بعد ما اطلق أميرة
شهيرة پصدمة شركة ايه هو مش المفروض ان الشركة دى بتاعتك انت مال بقى ابوك وعمك بالكلام ده
رياض ده بس قدام الناس لكن الاوراق بتقول كلام تانى
شهيرة بفضول وايه بقى الكلام التانى ده
رياض قانونا كل حاجة باسم بابا وعمى هم الشركا الحقيقيين مش انا
شهيرة برقت عينيها پصدمة وقالتله ايه الكلام الفارغ اللى انت بتقوله ده يعنى ايه بعنى كل العز ده مش باسمك
رياض وهو بيفتح باب مكتبه لأ مش باسمى
رياض دخل مكتبه وراح قعد على الكنبة ولسه بيتعدل لقى شهيرة فوق دماغه وقالتله اومال بتمشى شغلك ازاى السنين دى كلها
رياض بالتوكيلات اللى عاملينهالى واكيد هلاقيهم بيبلغونى بكرة واللا بعده انهم هيلغوها
شهيرة بلهفة ولسه هتقعد قوم قوم
رياض اقوم اروح فين
شهيرة وهى بتسحب رياض من ايده تروح للمحامى فورا تخليه يعمللك نقل ملكية بالتوكيلات دى
رياض سحب ايده من ايد شهيرة پصدمة وسكت شوية وهو بيبصلها وبعدين قاللها بسخرية دى توكيلات ادارة
—
مش توكيلات عامة ياحبيبتى
شهيرة باحباط يعنى كل حاجة راحت خلاص
رياض بفضول وانتى فاكرة انها لو توكيلات رسمى انى كان ممكن استولى على حاجة مش بتاعتى
شهيرة ده تعبك انت وشقاك انت بالسهولة دى ممكن يقولولك عنك انت
رياض كل اللى هقدر اعمله انى اقنعهم انى افضل فى مكانى فى الشركة
شهيرة پصدمة لا هو ممكن كمان يمشوك منها
رياض بتريقة من حكم فى ماله ماظلم ياحبيبتى
شهيرة بتوهان وهنعيش ازاى
رياض ماتقلقيش ان شاء الله هلاقيلها حل
شهيرة پغضب حل ايه اللى هتلاقيه وانت ازاى تخبى عليا حاجة زى دى من الاول هو ده الامان اللى كنت بتكلمنى عنه هو ده المستقبل
رياض بجمود المفروض انك فى موقف زى ده تساندينى يا شهيرة مش تعملى اللى انتى بتعمليه ده
شهيرة هو انا عملت حاجة لسه انا لسه هعمل
رياض بفضول وهتعملى ايه بقى
شهيرة بجمود لما اشوف الاول الحكاية هترسى على ايه
شهيرة قالت جملتها وسابته وخرجت ورزعت الباب رياض كان مذهول من كلامها ورد فعلها وقعد يفتكر اول ما ابتدى يتعلق بيها
فلاش باك
كان رياض قاعد فى مكتبه شغال على مشروع عنده فى الشركة الباب خبط و دخلت شهيرة كانت حاطة مكياچ كامل ورافعة شعرها لفوق وسايبة بعض الخصلات الرقيقة اللى نازلة على وشها ورقبتها وكانت حاطة برفيوم جذاب جدا من نفس النوع اللى بتستعمله أميرة وهو بيعشقه لفتت نظر رياض اول ما دخلت بمظهرها ووشها واصح عليه الزعل وقالت له اعذرنى يا باشمهندس رياض انا عارفة انك نسان خدوم وچانتى وانا ممنونة لك جدا على كل اللى عملته معايا بس انا شكلى كده هسيب الشغل
رياض باستغراب حصل ايه يامدام شهيرة
شهيرة باستعلاء ياباشمهندس انا المفروض فى طقم السكرتارية اللى تعتبر عنوان للشركة قدام عملائها والمفروض دايما ابقى متأنقة وشيك يقوم جزائى ان يتقال عليا انى جاية اصطاد عريس
رياض باستياء مين اللى قال كده
شهيرة بقوة قول مين ماقالش كده وعشان كده انا بفكر اسيب الشغل
رياض اعتقد انك اشتغلتى هنا لانك محتاجة الشغل ده زى ما اميرة وضحتلى وطالما احتكيتى بالحياة العملية فاعتقد انك المفروض تتعودى على كده
شهيرة بكسوف مش لدرجة انهم يتهمونى انى بحاول اجرجر رجلك عشان تعجب بيا
كانت الجملة دى اول باب اتفتح بين رياض وشهيرة واللى للاسف مااتقفلش تانى
وفى مرة تانية كان فى حفلة معزوم عليها رياض تبع شغله وشهيرة طلبت منه تروح معاه بصفتها السكرتيرة بتاعته ووقتها كان ابنه سليم عيان وكان محرج يطلب من أميرة انها تروح معاه الحفلة ووافق على طلب شهيرة اللى ماسابتش ايده طول الحفلة واللى كانت جريئة وقوية فى تعاملتها وطريقة تعارفها على العملاء واللى ساعد شركة رياض فى كسب عقود جديدة للشركة
وبعدها بقت بديل ثابت لاميرة فى الدعوات اللى بالشكل ده لحد مافى مرة بعد حفلة من الحفلات رياض كان بيوصلها البيت فشهيرة سألته هى أميرة عارفة انى ببقى معاك فى الشركة وبرة الشركة كمان
رياض الحقيقة لا
شهيرة بابتسامة عملت طيب
رياض اشمعنى يعنى
شهيرة بابتسامة لعوب ما انت عارف غيرة الستات فبلاش ۏجع دماغ
رياض ضحك بشدة وقاللها ايه وانتى مش ستات
شهيرة بكبر انا لايمكن اغير من حد انا عارفة قيمة نفسى كويس لكن أميرة يعنى
رياض باستغراب مالها أميرة
شهيرة اخاڤ تفسر تواجدنا مع بعض باستمرار غلط خصوصا ان طريقة كلامى عنك ملفتة
رياض مش فاهم
شهيرة انت المفروض بقيت عارفنى كويس الفترة دى انا صريحة و دوغرى ولما اتسألت عن رأيى فيك قلته فورا
رياض بمرح استر يارب وياترى بقى كان ايه رايك
شهيرة باڠراء انك الرجالة اللى زيك خلصوا من زمان
رياض مش فاهم
شهيرة بضحك يعنى انت القلب الكبير انت نعمة واحسان بحكمتك تختال علينا وانت مرآة حضارتنا
رياض ضحك جدا على كلام شهيرة وكانت وصلت خلاص البيت فقالتله ميرسى انا تعبتك معايا ولولا خوفى ان اميرة ممكن تظن فينا ظن بطال كنت عزمتك تطلع معايا ونشرب فنجان قهوة سوا
فتحت بابها وجت تنزل رياض شدها جامد فمالت عليه اوى وجت عيونهم فى عيون بعض رياض بلع ريقه بصوت واضح وقاللها انتى عاوزة منى ايه ياشهيرة
شهيرة بنظرة كلها اڠراء انا مش عاوزة غير انى افضل جنبك على طول
رياض ليه
شهيرة مش عارفة وخاېفة اعرف وخاېفة ابعد وخاېفة اقرب
رياض فزورة دى
شهيرة وهى بتشد نفسها منه سيبنى خلينى انزل
رياض ماسابهاش وفضل مقرب منها وقاللها تتجوزينى
شهيرة برقت عينيها وقالتله و اميرة .. وحبك ليها
رياض حبى لاميرة خلص من زمان بس الظاهر انى ماكنتش واخد بالى كل اللى انا عارفه دلوقتى انى ھموت عليكى وعاوزك
شهيرة هتعلن جوازنا
رياض سيبى كل حاجة للظروف
شهيرة وانا ايه اللى يجبرنى اتجوز فى السر
رياض هعملك كل اللى انتى عاوزاه هعيشك فى هنا ونعيم مش هخليكى محتاجة حاجة غير ان قلبى هيبقى ليكى انتى وبس
شهيرة ازاى وانت هتبقى متجوزنى ومتجوز أميرة فى نفس الوقت
رياض انا لولا الولاد كنت طلقتها وكمان ابويا وعمى العيلة كلها ممكن تقاطع بعصها لو طلقت اميرة ماتنسيش انها بنت عمى
شهيرة بامتعاض وحبك الاول
رياض وانتى حبى الاخير
شهيرة سيبنى افكر
عودة من الفلاش باك
رياض افتكر ان شهيرة رغم ان كل تصرفاتها كانت بتقول انها ھتموت عليه الا انها ماوافقتش على الجواز غير بعد ما اشترالها الفيلا وكتبها باسمها وجابلها عربية صغيرة و قدم لجودى فى مدرسة انترناشونال
وقارن بينها وبين أميرة اللى رغم انهم ولاد عيلة واحدة ورغم ان الكل كان بيحاول يقدملهم كل رخيص وغالى الا انه ماقدرش يفتكر انها طلبت منه حاجة خاصة بيها من يوم ما قلوبهم ولفت على قلوب بعض كانت دايما امنياتها وطلباتهأ بتعود بالسعادة والرضا عليه وعلى ولادهم
يوه يارياض .. انت جاى دلوقتى تعمل المقارنة دى ليه وليه ميزانك اختلف المرة دى مش دى اميرة اللى قررت انها بقت باهتة فى حياتك طب اهى طلبت الطلاق ياحلو والتانية راخرة ماصدقت وعاوزاك تطلقها بجد وجت لها على الطبطاب طب وانت فين بقى من كل ده انت عاوز ايه وهم هيعملوا ايه
رياض رجع راسه لورا وسندها على الكنبة وهو بينفخ وقال ياترى الحريم هيعملوا فيك ايه ياجوز الاتنين
البارت التالت
أميرة كانت فى بيت باباها بتحاول تبان طبيعية ماحكتش لحد عن اللى حصل قررت تخبى ومابقيتش عارفة السبب الحقيقى لتخبيتها
هل خاېفة على زعلهم واللا خاېفة من المشاكل واللا لخړاب بيتها بس كان فى حرب خفية قايمة بينها وبين روحها
خاېفة لا النفوس تشيل من بعضها واللا ناوية تكملى عادى يا أميرة وكأن مافيش حاجة حصلت
معقولة لأ طبعا ازاى يعنى لازم يطلقنى
طب ماهو عشان يطلقك لازم تقولى للكبار وهم يتصرفوا
طب مانا ممكن اقول لعمى وهو يتصرف لكن بلاش بابا صحته ممكن ماتستحملش
طب لو عمك نصحك تحافظى على بيتك وخلاه يطلقها هى هتوافقى تكملى
طب مش يمكن هو يرفض يطلقها هيبقى موقفك ايه بقى ساعتها
طب لو وافق يطلقها هتقدرى تتعاملى معاه عادى كأن ماحصلش حاجة
لما باباها ومامتها قعدوا كل شوية يسألوها عن سر سرحانها كل شوية وحست ان شكلها باين قررت ترجع بيتها
ولما رجعت البيت طلبت
—
من ولادها ان كل واحد فيهم يحضر شنطة صغيرة عشان هيسافروا
وقررت تاخد ولادها ويسافروا يقضوا شوية وقت فى الشالية بتاعهم اللى فى الساحل وعرفت باباها ومامتها واخوها ولما سألوها عن رياض قالتلهم الحقيقة بس مش كاملة قالتلهم انه مشغول وبس لكن ماقالتلهومش سر انشغاله
قبل ماتتحرك من البيت قررت تبعت رسالة لرياض تعرفه فيها مكانها هى والولاد فبعتت قالتله عملا باتفاقنا اللى اتفقنا عليه من يوم ما اتجوزنا وانى ابلغك بنيتى للخروج والمكان اللى ناوية اروحله .. فانا واخدة الولاد ورايحة شالية الساحل
انا ماقلتش لحد على اللى حصل ياريت لما ارجع الاقيك نفذتلى رغبتى بانك تاخد حاجتك كلها من البيت و بالانفصال بلاش بعد العمر ده كله و نيجى على الاخر ونأذى بعض او نجرح بعض اكتر من كده يا ابن عمى
أميرة بعد مابعتت الرسالة اخدت الولاد والشنط ونزلوا راحوا على العربية وحطوا شنطهم واميرة اخدتهم بعد كده على السوبر ماركيت اشتروا شوية لوازم ليهم لزوم قعدتهم هناك
رياض لما استلم الرسالة وفتحها حس انه مخڼوق ولاول مرة يحس انه نفسه كان يبقى مع أميرة والولاد ومش قادر او مش عارف ازاى يعمل ده
رياض وهو قاعد فى مكتبه حس انه جعان وافتكر فجأة انه مااكلش حاجة من امبارح فخرج من اوضة المكتب يدور على شهيرة لقاها قاعدة فى الليفنج بتكلم صحبتها على الفون فراح يدور على جودى قعد ينده عليها مالقهاش فسأل عليها شهيرة قالتله تلاقيها بتلعب فى الجنينة خرج يبص عليها برضة مالقهاش وفى الاخر وهو معدى جنب المطبخ لمحها وهى قاعدة على كرسى من كراسى ترابيزة المطبخ وساندة جسمها وراسها على الترابيزة ولقاها غرقانة فى النوم ولقى على الترابيزة قدامها عيش ولانشون وجبنة
رياض خرج نده على شهيرة اللى قفلت مع صاحبتها وجت وهى بتنفخ وبتقول فى ايه يا رياض عمال تنده عاوز ايه
رياض باستغراب انتى سايبة بنتك نايمة كده ليه
شهيرة وهى بتخبط على راسها بايدها ياخبر دى جاتلى وكانت عاوزانى اعمللها سندوتش ونسيتها خالص
رياض بذهول نسيتيها .. بنتك جعانة وسيبتيها وقعدتى ترغى فى الفون ونسيتيها لحد مانامت وهى جعانة
شهيرة اطلبلنا اكل طيب وانا هفوقها على ما الاكل يوصل
رياض انتى ماعملتيش اكل
شهيرة بتمرد اكل ايه ده اللى اعمله انت ناسى اننا ادينا الشغالة اجازة عشان كنا المفروض مسافرين وبكرة يبقى عيد ميلادى اللى كان المفروض هنحتفل بيه هناك مع اصحابى اللى عمالين يكلمونى كل شوية ومستغربين اننا ماوصلناش لحد دلوقتى وانا مش عارفة اقوللهم ايه
رياض بدهشة اصحابك ايه وعيد ميلاد ايه اللى بتتكلمى عنهم انا بقوللك بنتك نامت جعانة وانا كمان ما اكلتش من امبارح
شهيرة ماقلتلك اطلب اكل يارياض وسيبنى افكر هقوللهم ايه
رياض نفخ ومشى من قدامها وهو بيقوللها انا هروح اجيب حاجة ناكلها وانتى صحى بنتك وفوقيها على ما اجى
رياض خرج ركب عربيته وساق وراح عشان يجيب حاجة ياكلوها وبعد مامشى بالعربية شوية رجع ركن على جنب وقرر انه يروح شقته مع أميرة
وفعلا راح وطلع فضل واقف شوية فى الريسبشن بيتنقل بعينه بين اركانها وبيفتكر مواقف حصلت بينه وبين اميرة واولاده
سمع صوت معدته وافتكر انه برضة لسه ما اكلش راح ناحية المطبخ وفتح الفريزر كان عارف ان اميرة دايما بتبقى مجهزة اكل للطوارئ ويادوب يطلع على الميكروييف وفعلا طلع من الديب فريزر طاجن حطه فى الميكروييف وقعد يستناه يجهز عشان ياكل وبعدين افتكر جودى فطلع تليفونه عمل اوردر اكل وبعته على الفيلا عند شهيرة وكلم شهيرة قاللها انه بعتلهم اكل و انه محتاج يقعد مع نفسه فهيبات فى شقته
شهيرة كانت هتتجنن لما عرفت انه هيبعد عنها رغم انها كانت معتقدة ان خلاص كده بقى فى حضنها باستمرار فقررت انها مش هتديله فرصة انه يعمل كده
رياض لما الاكل جهز قعد اكل ونضف مكان ما اكل ورجع كل حاجة زى ماكانت بالظبط وراح ناحية اوضة النوم وغير هدومه وحط نفسه فى السرير حاول ينام ماقدرش بقى كل شوية يفتح عينه ويبص على مكان أميرة وهو مستغرب المكان من غيرها وبقى عمال يتقلب يمين وشمال لاعارف يفكر ولا عارف ينام
سمع جرس الباب استغرب وقعد يسأل روحه .. ياترى مين ولما قام يشوف اتفاجئ بشهيرة ومن غير جودى
رياض بلهفة شهيرة ايه اللى جابك وفين جودى
شهيرة دخلت وراحت قعدت بكل اريحية وقالتله جاية لك وسيبت جودى مع النانى بتاعتها طلبتها تيجى تبات معاها
رياض بفضول و تبات معاها ليه
شهيرة لانى قررت ابات معاك هنا
رياض بعدم استيعاب هنا فين
شهيرة قامت راحت ناحيتة وطوقت رقبته بايدها وقالتله هنا ياحبيبى فى شقتك
رياض ببداية ڠضب انتى اتجننتى انتى عاوزة تباتى فى شقة أميرة
شهيرة بعنجهية تقصد شقتك يعنى شقة جوزى وعادى انى ابات فيها معاه .. واللا ايه
رياض باستغراب انتى بتستهبلى ياشهيرة ازاى يعنى الكلام ده يعنى ينفع اسيب أميرة تروح تبات فى الفيلا وانتى مش موجودة
شهيرة بنبرة اعتراض لا ياحبيبى هناك فرق خد بالك الفيلا دى فيلتى انا وباسمى انا مش مسموح لحد انه يدخلها غير باذنى انما دى شقتك انت يعنى شقة جوزى وليا حق فيها زى اميرة بالظبط
رياض بحزم شيلى الهبل ده من دماغك وخدى بعضك وروحى لبنتك
شهيرة بدلال بقى انا جاية لك لحد عندك عشان نحتفل سوا بعيد ميلادى وانت عاوزنى امشى لوحدى
رياض هتمشى ياشهيرة ولوحدك وانا هفضل هنا ولوحدى لحد ما اجيلك بكرة
شهيرة بس انا مش هسيبك لوحدك ثم انا كانت امنيتى انى ابات معاك هنا فى شقتك واهى الفرصة جتلى لحد عندى ومش هضيعها
رياض وهو بيشد شهيرة يقومها اللى انتى بتقوليه ده مش هيحصل و دخول البيت ده مرة تانية مايتكررش وحافظى على خصوصية أميرة عشان أحافظ على خصوصيتك لو عاوزة والا ماتلوميش الا نفسك
شهيرة پغضب يعنى ايه يعنى انت بتطردنى من بيتك
رياض انا بحافظ على كرامة أميرة وعلى كرامتك معاها وياريت تفهمى كده كويس ولما توصلى البيت ابقى طمنينى انك وصلتى بالسلامة
قال الجملة الاخيرة وهو بيقفل الباب وراها بعد ماخرجها من الشقة وبعد مامشاها سند ضهره على الباب وقال هو انا كنت اعمى للدرجة دى واللا الفيلم اللى خلص بدرى
رياض رجع قعد فى اوضة النوم من تانى بس كان حاسس ان جواه ڠضب على قلق ماكانش مرتاح وحاسس ان دماغه مشلۏلة فكر يروح لابوه بس رجع فى كلامه هيروح يقول له ايه ولو سأله على اميرة هيكون رده ايه طب هيعمل ايه مع اميرة وهيتصرف ازاى وبعد ماقعد فى الحيرة دى شوية فجأة قام لبس هدومه وعمل شنطة صغيرة ليه ونزل وقرر انه يروح لأميرة لانه حس انه لازم الحل يبتدى من عندها
بعد ماركب العربية وابتدى ياخد الطريق كلم شهيرة
شهيرة بنبرة زعل عاوز منى ايه يارياض بعد ماطردتنى من بيتك
رياض بلاش هبل ياشهيرة واعقلى كده وخليكى على مستوى المصېبة اللى انا فيها
شهيرة پصدمة وهو جوازك منى مصېبة يارياض
رياض بعصبية ماتقعديش تحورى فى الكلام واسمعى
—
للاخر اميرة واقفالى على الطلاق
شهيرة پغضب طب ماتطلقها واحدة مش عاوزاك ماتسيبها انا مش فاهمة انت ليه مش عاوز تطلقها وتخلصنا من الموضوع ده
رياض بزعيق انتى متخلفة انتى ناسية انها بنت عمى وناسية ان بيننا ولاد وعشرة عمر ازاى يعنى اطلقها بالسهولة دى
شهيرة بس انت مابقيتش تحبها انت قلتلى كده واللا كنت بتضحك عليا ساعتها
رياض سكت شوية وبعدين قال اسمعى ياشهيرة انا يمكن مش قادر اعرف انا لما قلتلك الكلام ده كنت فعلا مصدقه من جوايا واللا لا بس اللى لازم تفهميه كويس انى ما اقدرش اسيب اميرة .. وعشان كده انا مسافرلها دلوقتى
شهيرة ايه مسافرلها ازاى وفين مش هى عند ابوها
رياض اسمه باباها يا اميرة ولأ أميرة سافرت الساحل
شهيرة وانت بقى مسافرلها الساحل دلوقتى يعنى بعد ماكنت مسافر معايا والناس كانت ومازالت مستنيانا فى دهب عشان عيد ميلادى هتسيبنى وتسافر تتفسح معاها
رياض پغضب هو ده كل اللى شاغل دماغك عيد ميلادك والحفلة والناس انا تعبت من كتر ما انا بحاول افهم فيكى انا رايح الحق بيتى اللى هيتخرب وولادى اللى هيكرهونى
شهيرة وهى أميرة بس اللى بيتك ما انا كمان بيتك واللا عشان ماسيبتنيش اخلف منك يبقى خلاص ماليش لازمة وسهل كده انك ترمينى وتروحلها ده مش عدل يا رياض
رياض ارميكى كل ده وارميكى على فكرة لو ركزتى شوية مع الفترة اللى اتجوزنا فيها هتلاقى ان كل سفرياتى انتى اللى كنتى معايا كل سهراتى انتى اللى كنتى فيها كل اوقاتى برة الشغل انتى اللى كنتى فيها
تقدرى تقوليلى امتى قعدت مع اميرة واللا وديتها فى حتة ده حتى المصيف كانت هتروح مع الولاد لوحدها
زعلانة على عيد ميلادك واللى يبقى بالمناسبة لو انتى نسيتى يبقى عيد جوازى انا واميرة ورغم ذلك كنت مسافر معاكى انتى وسايبها هى
ماكنتيش شايفة يعنى ان ده مش عدل برضة
شهيرة انت كنت بمزاجك على فكرة انا ماغصبتكش
رياض واميرة برضة ماغصبتنيش بالعكس دى يمكن كمان تطردنى لما اروحلها وماتسمحليش افضل معاهم
شهيرة بزهق انت بتكلمنى عاوز ايه يارياض
رياض انا بعرفك انى مسافر ياشهيرة وماعرفش هقعد اد ايه ولا هرجع امنى
شهيرة واديك عرفتنى مع السلامة وقفلت السكة
رياض نفخ وقفل تليفونه وقعد يستغفر ومابقاش عارف هو صح واللا غلط
عند أميرة . كانت وصلت الشاليه هى والولاد والولاد ساعدوها انها تنضف الشالية ويرتبوا الحاجات اللى جابوها معاهم وطلبت منهم كل واحد ياخد حمام وبعد ما اتعشوا كل واحد راح عشان ينام فى مكانه
اميرة كانت اخر واحدة اخدت حمام بعد ما اتاكدت ان كله تمام وكانت بتتعمد ترهق نفسها عشان كان نفسها تنام ودماغها تفصل من التفكير شوية وخرجت من الحمام دخلت سريرها اول ماحطت راسها على المخدة ..عينها تلقائى بصت على المكان اللى المفروض رياض بينام فيه كان جواها قهرة كبيرة جوزها وصاحبتها المقربة
يمكن مش صاحبة عمرها لانها ماعرفتش شهيرة غير من اربع سنين اتعرفت عليها فى النادى كانت شابة وصغيرة وجميلة اول ماعرفت انها ارملة .. حست ان قلبها ۏجعها عليها انها تترمل وهى لسه فى السن الصغير ده
عرفت ان جوزها ماټ فى حاډثة وعرفت منها بعد كده ان معاشه صغير جدا لانه ماكملش فترة كفاية فى شغله وان اخوات جوزها مابيساعدوهاش حتى فى مصاريف بنتها
صعبت عليها وابتدت تتعاطف معاها وتساعدها بكل طريقة وهى بتحاول ماتبينش انها تقصد المساعدة عشان ماتجرحش احساسها لحد ما اقترحت عليها انها تشتغل وكلمت رياض عشان يشوفلها شغل عنده فى الشركة وفى اول شغلها كانت بتاخد منها جودى تخليها معاها على مامعاد شغلها يخلص اكنها بيبى سيتر
أميرة طول ماكانت بتفتكر كانت شوية ټعيط وشوية تضحك على نفسها لحد ماعينها راحت فى النوم لكن صحيت فجأة من نومها مخضۏضة على حد بيحضنها وهى نايمة
لما قامت منفوضة من مكانها وهى شبه بتصرخ لقت رياض بيقوللها
رياض ششششششش ده انا يا اميرة انا رياض
على مااستجمعت نفسها من تانى وابتدت تركز بصت لقته لابس بيچامته وفهمت انه جه وغير هدومه كمان فبصتله بهدوء وقالت حمدلله على السلامة جيت ليه
رياض ماكنتيش عاوزانى اجى
أميرة ما اقدرش امنعك من وجودك فى بيتك
رياض رغم ذلك طلبتى منى هناك انى امشى
اميرة وهى بتعدل نفسها وهدومها اسمع يارياض انت ابن عمى من قبل ما يبقى ليك اى صفة تانية فى حياتى وبرضة بعد زوال الصفة دى فانت هتفضل برضة ابن عمى ڠصب عنى وعنك لكن صدقنى مش هينفع نبقى غير كده
رياض يا اميرة صدقينى انا عارف ان ليكى حق فى كل اللى انتى بتقوليه لكن انا عاوزك تفكرى بصورة أوسع شوية فكرى فى الولاد فى بابا وعمى فى علاقتنا كلنا ببعض انتى طول عمرك عاقلة وبتعرفى تحكمى على الامور كويس
اميرة بصتله بسخرية وقالتله عاقلة ! .. عقلى ده اتسمى برود عقلى ده بقى ممل ومحبط
رياض باسف انا ماكنتش اقصد صدقينى .. انا اسف
اميرة بابتسامة بجد .. بجد انت اسف اسف على ايه يارياض اسف على غدرك وخداعك ليا واللا اسف على اهمالك ليا ولولادنا اللى كنت بحاول الاقيله الف عذر وعذر
اسف انك رميت عشرة سنين طويلة ودوست عليها برجلك واللا اسف انك بقالك سنة كاملة وانت بتكدب عليا كل يوم مية كدبة وكدبة
واللا اسف على ولادك اللى حتى مابقيتش تعرف عنهم اى حاجة غير بالصدفة لدرجة انهم بقم يشحتوك
واللا أسف انك استحليت لنفسك انك تعيش عيشة تانية بوش تانى بعيد عننا
واللا اسف على بخلك عليا وعلى ولادك طول الفترة اللى فاتت
رياض بدفاع عن نفسه انا عمرى مابخلت عليكم يا أميرة
أميرة لما تحوش الضحكة عن وشك قدامنا تبقى بخلت لما تضن بوقتك علينا تبقى بخلت لما تحرمنى وتحرم ولادك من وجودك تبقى بخلت لما يوصل الحال بولادك انهم يشتاقوا لصوتك تبقى بخلت يا رياض
بخلت بحبك عليهم زى ما بخلت بوقتك بالظبط
رياض كان حاسس انه خجلان لان كل كلمة اميرة قالتها مظبوطة وحصلت وقبل مايرد عليها لقاها قامت وحطت روبها عليها وراحت ناحية باب الاوضة فقاللها رايحة فين
أميرة هنام مع الولاد
رياض قام بسرعة ومسكها من كتافها وقاللها ولما يصحوا الصبح ويلاقوكى نايمة معاهم وانا موجود هتقوليلهم ايه
أميرة هقوللهم ان ده الطبيعى من هنا ورايح
رياض يا اميرة ارجوكى خلينا نتقابل فى نقطة ونتفق بلاش اللى فى دماغك ده
أميرة بصتله وهى بتتنقل مابين عيونه شوية وبعدين قالتله بتنهيدة فاكر
لما حاولت اخليك تتعامل مع فنى الصيانة اللى رفضت تتعامل معاه تانى عشان ماعمللكش اللى كنت طالبه منه رغم انه فهمك ان كله تمام فاكر قلتلى ايه قلتلى طالما غشنا مرة يبقى هيغشنا كل مرة
رياض بذهول انتى بتقارنينى بفنى الصيانة يا أميرة
أميرة فنى الصيانة لما يغشنى مش هفرق معاه ولا هيفرق معايا لا عاشرنى ولا يعرفنى من الاساس يارياض انما انت ياحب عمرى وعشرتى السنين دى كلها تفتكر انى ممكن يجيلى نوم فى حضنك مرة تانية
اميرة كانت ابتدت عيونها تتملى بالدموع وهى بتتكلم وكملت
—
وقالت للاسف يارياض لو كنت هنت عليك الفترة اللى فاتت دى كلها انك تبقى فى حضنى وانت راشق خنجرك فى ضهرى فانا مايهونش عليا ابدا انى ابقى فى حضنك وانا مش حاسة معاك بالامان
للاسف يارياض الچرح اللى جرحتهولى مالوش علاج غير الكى والكى فى حالتنا دى هو الطلاق
رياض اناثر من كلام أميرة وحس ان قلبه وجعه على ۏجعها وندم على كل يوم بعد فيه عنها وعن ولاده فقاللها أميرة ارجوكى سامحينى انا عارف انى غلطت غلطة كبيرة وان مش سهل ابدا انك تسامحينى عليها بس انا طمعان فى حبك انه يغفرلى
أميرة شدت نفسها من بين ايده وخرجت من الاوضة بعد ماقالتله للاسف يا رياض مش كل الذنوب بتتغفر
أميرة راحت على اوضة ولادها وباتت ليلتها معاهم وهى بتدعى ربنا انه يلهمها الصواب
و رياض فضل فى اوضتهم ومن كتر التعب نام لحد ما اتفاجئ الصبح بولاده وهم بيصحوه فرحانين بيه جدا انه هيقضى معاهم جزء من اجازتهم وخلوه يقوم عشان يفطر معاهم قبل مايروحوا البحر
رياض قام خرج من الاوضة لقى أميرة محضرة الفطار وقاعدة فى مكانها سرحانة وهى مستنياهم فرياض انتهز فرصة ان الولاد موجودين وراح ناحيتها ووطى عليها باسها من راسها وقال لها صباح الخير ياحبيبتى
أميرة بصتله بصة تحذير بمعنى اياك تكررها فرياض ابتسم وقعد جنبها عشان يفطر وبقى يتعمد انه كل شوية يطلب منها حاجة وأميرة مش حابة تضايق الولاد بعد ماشافت هم اد ايه انبسطوا جدا من وجود باباهم معاهم
سليم ماما هتنزلى معايا البحر زى ما وعدتينى
أميرة ان شاء الله ياحبيبى
هادى انا نفختلك العوامة بتاعتك ياسليم
هدى على فكرة ياماما حضرتك ماجبتليش اقلام الرسم
أميرة باعتذار ياخبر معلش ياهدى بس انا متهيألى ممكن ماالاقيلكيش من الاقلام بتاعتك دى هنا فى الساحل
رياض انا عندى فى العربية قلمين رسم ياهدى ممكن اديكى منهم واحد على مانرجع القاهرة
هدى بسعادة هو حضرتك هتفضل معانا هنا على مانرجع كلنا سوا
رياض وهو بيبص لأميرة برجاء ده لو مامتكم ماعندهاش مانع
هادى بفرحة الله حضرتك بقالك كتير اوى ماقعدتش معانا
رياض حس باسف وخجل لما ابنه حسسه هو أد ايه مقصر معاهم
سليم بشقاوة بس خد بالك يا بابا برضة ماما هتفضل تنزل معايا البحر كل يوم
رياض طب ما تسيبنى انزل معاكم ياعم سليم
هدى احنا زمان كنا بننزل كلنا سوا .. فاكر يا بابا
هادى وهو بيضحك بابا كان بيعوم وبيشيل كل واحد على ضهره شوية حتى ماما كان ساعات ياخدها على ضهره ويعوم بيها
رياض وأميرة عيونهم اتقابلت مع ذكريات ولادهم أميرة بۏجع ورياض بندم وحنين لانه حس ان قعدته وسط أميرة وولاده كانت فعلا وحشاه وكان مفتقدها جدا
بعد ماخلصوا فطارهم الولاد دخلوا لبسوا المايوهات بتاعتهم ورياض كمان دخل لبس شورت وتيشيرت وخرج لقى ولاده جاهزين واميرة كانت حضرت سندوتشات وعصاير عشان الولاد على البحر ودخلت تغير بعد ما رياض خرج من الاوضة
نزلوا على البحر حطوا حاجتهم وهدى وهادى جريوا على البحر وسليم شد ايد أميرة عشان تنزل معاه فراحت مع ولادها و رياض فضل قاعد على الترابيزة شوية وبعدين قام حصلهم ونزل لهم الماية
الولاد كانوا مبسوطين جدا ورياض كان بيحاول بكل طريقة انه يفتح كلام مع اميرة فى اى حاجة بس هى كانت بترد باختصار شديد جدا
رياض كان كل ماتجيله فرصة كان بيقعد يتأمل فى ملامح أميرة شمس الصبحية كانت منورة وشها جمالها زاد عن زمان وشها منور بابتسامتها اللى مابتفارقهاش ابدا رغم قلبها اللى مكسور جواها لكن كانت رسمة ابتسامتها لولادها وبترد على اسئلتهم وكلامهم وشقاوتهم اللى مابتنتهيش بكل رحابة وصبر
وافتكر شهيرة اللى مابتستحملش حركة جودى جنبها اكتر من خمس دقايق ودايما رامية مسئوليتها عليه وعلى المربية بتاعتها
وفى وسط ما رياض مع ولاده وأميرة فى البحر لمح حد قاعد على الترابيزة بتاعتهم وبيتفرج عليهم ولما ركز لقى ان اللى قاعدين يبقوا شهيرة وجودى
رياض بغيظ ومن غير مايحس وهو باصص عليهم قال شكلك مش ناوية تجيبيها لبر
أميرة سمعته وفكرت انه بيوجهلها الكلام فبصتله ولسه هترد عليه لقته مركز عينه على حاجة على الشط ولما بصت شافت اللى شافه وفهمت قصده واتضايقت جدا لما شافت شهيرة وحست ان الموضوع مش هيتحل بسهولة ولا بهدوء زى مواضيع كتير تانية
رياض بص لأميرة باعتذار وقاللها اقسملك انى ما اعرفش انها جاية
أميرة بسخرية واضح ان فيك حاجات كتير اتغيرت وانا ماكنتش اعرف
اميرة كانت تقصد ان رياض كان منبه عليها اول ما اتجوزوا انها ماتروحش فى اى مكان غير لما تبلغه الاول عشان يبقى عارف مكانها وبقالهم سنين ماشيين على اتفاقهم ده
ورياض فهم تلميحها وافتكر ان شهيرة عمرها ما التزمت باتفاقهم ده لما حاول يخليها تعمل زى أميرة وكانت كل مرة تطلعله بحجة شكل
رياض ساب أميرة وولاده فى البحر وطلع راح ناحية شهيرة وهو منغاظ منها جدا واول ما وصل عندهم شهيرة قربت منه وباسته من خده وهى مركزة عيونها عند اميرة وولاده
رياض شد نفسه منها وقالها بجدية شديدة ايه اللى جابك ياشهيرة وماقلتليش ليه انك جاية
شهيرة حبيبى انا قلت طالما أميرة عرفت كل حاجة يبقى مافيهاش حاجة ابدا اننا نتجمع كلنا مع بعض ونقضى يومين حلوين سوا
رياض بغيظ انتى مش هتبطلى استهبال انتى عارفة كويس الدنيا عاملة ازاى والكل اعصابة مشدودة انتى ليه مش عاوزة تسيبى الدنيا تهدى شوية
شهيرة بتريقة هى ايه دى اللى مشدودة اشحال ان ماكنتش طالع من البحر وكنت بتلعب معاهم فى الماية
رياض بتوضيح انا من يوم ما اتجوزتك وانا بعيد عن ولادى ومن حقهم انى بعد المدة دى كلها انهم يشوفونى ويقعدوا معايا واللا انتى شايفة ايه
شهيرة بمسكنة وهو انا عشان بنتى يتيمة مش من حقها ان هى كمان تتفسح وتنبسط
رياض مسح بايده على وشه وراسه وهو بيتنهد تنهيدة جامدة وقاللها انتى عارفة كويس انى عملت مع جودى اللى ماعملتوش مع ولادى ياشهيرة فلمى الدور وخدى بعضك وارجعى مطرح ماجيتى بالظبط
شهيرة برجاء طب سيبنى النهاردة بس عشان البنت خاطرها ماينكسرش مش شايف هى فرحانة بولادك ازاى
فى الوقت ده كانت جودى واقفة عمالة تشاور بايدها الاتنين لسليم واخواته وعاوزة تدخل لهم الماية
رياض الټفت وراه لقى أميرة طلعت من الماية وقاعدة على ركبها قدام جودى بتتكلم معاها برقة وواضح ان جودى بتقولها انها عاوزة تنزل معاهم فأميرة ندهت على هادى وقالتله حاجة ورجعت الماية تانى مع هدى وسابت سليم مع جودى بيلعبوا مع بعض على الشط
هادى راح ناحية باباه وشهيرة وسلم على شهيرة بادب وقاللها لو حضرتك معاكى مايوه لجودى غيريلها وهاتيها تنزل معانا
رياض بتلقائية بص على أميرة نظرة مليانة امتنان لانه عارف هى اد ايه بتحب جودى وبتعطف عليها علشان يتيمة واد ايه كان حاسس بالفخر من ناحيتها ان معاملتها للبنت ما اتغيرتش بعد اللى حصل
شهيرة بصت لرياض لقت عيونه مليانة حب لأميرة فقالت له انا اخاڤ على بنتى منها بعد اللى حصل
رياض
پصدمة انتى اټهبلتى ده انتى تخافى على بنتك من روحك ولا تخافيش عليها من أميرة
شهيرة بغيظ ليه ان شاء الله ملاك من السما هى عشان تخاف على بنت ضرتها اكتر من امها
رياض بدهشة زى ما تكون الكلمة اول مرة يسمعها ضرتها
جودى كانت وصلت عند شهيرة من تانى وقالتلها ياللا ياماما قلعينى الفستان عشان انزل مع طتط ميرا البحر
رياض بص لجودى وقاللها هو انتى لابسة المايوة تحت الفستان
جودى ايوة ماما لبستهولى فى البيت عشان انزل البحر مع سليم
رياض بص لشهيرة بغيظ وعملها حركة بايده معناها نفذى اللى بنتك قالته
شهيرة كانت ملبسة بنتها فعلا مايوة بكينى وعليه فستان ويادوب قلعتها الفستان والجزمة بتاعتها وقالتلها .. روحى ياللا
رياض قالها فين العوامة بتاعتها
شهيرة مش لازم ماهى اميرة معاها وهتاخد بالها منها وتعالى انت دخلنى الشالية عشان اغير هدومى
رياض سكت شوية وبعدين قاللها مافيش شاليهات وماتتحركيش من مكانك هنا وياريت تحاولى تعملى حاجة عكس اللى انا قلتها يا شهيرة
وسابها ورجع الماية والولاد اول ماشافوه نازللهم تانى قعدوا يهيصوا ويصقفوا واميرة خلت هادى جاب العوامة الاحتياطى ونفختها ولبستها لجودى واللى كانت سعيدة ومبسوطة جدا وهى بتلعب مع ولاد رياض واللى كانوا بيعاملوها بمنتهى الرقة والحنان لان اميرة مفهماهم انها يتيمة ولازم يتعاملوا معاها كويس
رياض لمس كل ده بسرعة واد ايه كان فخره بأميرة بيزيد كل ثانية ولاحظ ان اميرة ولا مرة التفتت ناحية شهيرة حتى ولو بعينها وكان كل تركيزها وانتباهها مع الولاد لغاية ما جودى قالت لاميرة طنط ميرا .. هو انتى عاملة سندوتشات
اميرة بابتسامة انتى جعانة
جودى ااه اصل لما صحينا الصبح ماما لبستنى وركبنا العربية على طول وماما قالتلى مافيش وقت ناكل وانا دلوقتى جعت
اميرة بصت لهادى ومن غير كلام هادى مسك جودى من ايدها وقاللها تعالى اجيبلك سندوتش تاكليه وننزل تانى
جودى بطفولة هتفضل معايا على ما اكل .. ماتسيبنيش وتمشى
هادى بابتسامة مش همشى .. ياللا
هادى راح على الترابيزة ومعاه جودى وطلع الحافظة اللى اميرة كانت مجهزاها وفتحها وطلع منها سندوتش اداه لجودى وفضل قاعد جنبها على ما اكلته كله وسألها لو كانت عاوزة تانى بس هى قالتله انها شبعت ففتح لها علبة عصير وادهالها عشان تشربها وبعد ماخلصت اخدها ورجع بيها عند أميرة والباقيين تانى
فضلوا فترة كبيرة فى الماية لحد ما الولاد ابتدوا يجوعوا فقرروا انهم يطلعوا كلهم عشان ياكلوا بس اميرة قالت لاولادها اطلعوا انتو يا اولاد كلو وانا شوية وهحصلكم
رياض ماجوعتيش
اميرة من غير ماتبصله لأ .. ماليش نفس واديتله ضهرها وابتدت تعوم فى اتجاه بعيد عنهم
سليم قال لابوه بزعل انا عاوز افضل مع ماما
رياض معلش ياحبيبى ماما من الصبح معاكم عشان تاخد بالها منكم سيبوها بقى تنبسط شوية زيكم
رياض قال كده لولاده وهو جواه قلق مبهم مش فاهم سببه وكان كل شوية يبص على اميرة وقبل مايطلع تماما من الماية كان بيتلفت يبص عليها لقاها بعدت اوى فطلع ولاده بسرعة من الماية وقال لهادى وهدى خدوا سليم وجودى وروحوا اقعدوا على الترابيزة لغاية ما اجيلكم انا وماما
قاللهم كده واتاكد انهم سمعوه وفهموا اللى قاله ورجع دخل بسرعة على البحر من تانى وابتدى يعوم بسرعة ناحية اميرة