رواية سليم

الفصل الاول

فى شقة راقيه جداا بالمعادى يعم بها دايطئما هدوء شديد يسكن بها ايمان

ايمان سيده جميلخ من بره و من جوه واى حد بيتعرف بيها بيحترمها وبيحبها و خاصة إنها ببيتها السيدة و الرجل فنفس الوقت

ايمان عمرها ٤٠ سنة اتجوزت وهى عمرها ٢٥ سنة بعد ما اتخرجت من كلية التجارة وعشان تقديرها كان امتياز اتعينت فى بنك واللى اتعرفت على جوزها سليم فيه

سليم كان بيشتغل معاها فى نفس البنك بس ماكانش تعيين كان من اللى بيتقال عليهم يومية وكان اقدم منها فى البنك بحوالى ٣ سنين حبها واتقدملها ورغم ان ماكانش متعين الا انها وافقت عليه لان هى كمان انجذبت له وحبته لكن بعد الجواز بسنتين وبعد ماربنا رزقهم ببنت زى القمر سموها أمنية سليم جاله عقد عمل برة مصر وبما انه مش متثبت فى البنك قرر انه يسافر ويعمل قرشين يقدر يعمل بيهم مشروع فى مصر لما يقرر انه يستقر

وسافر سليم من ١٣ سنة وكانت ايمان لسه عمرها ٢٧ سنة تعبت فى البداية وهى لوحدها كانت لسه صغيرة وماعندهاش خبرة كفاية بالحياة لكن يوم ورا التانى ايمان اتعودت تعتمد على نفسها وتشيل مسئوليتها ومسئولية بيتها بالكامل وكمان مسئولية بنتها وخصوصا ان طول ال ١٣ سنة سليم مانزلش مصر غير مرتين بس كل مرة اسبوعين مش اكتر

كانوا عايشين حياتهم على النت والتليفون وبس

لحد فى يوم بعد ايمان ما اتطمنت ان امنية بنتها نامت وراحت هى كمان اوضتها وصلت فرضها ولسه هتبتدى تدخل السرير عشان تنام سمعت جرس الباب بيض.رب

الساعة كانت عدت عشرة حطت شال على راسها وراحت بصت من العين السحرية لقت الدنيا ضلمة رغم انها فاتحة النور قدام شقتها باستمرار

ايمان وقفت ورا الباب وقالت بصوت واضح مين

ماحدش رد عليها رغم ان الجرس رن تانى كررت سؤالها وبرضة ماحدش رد عليها

ايمان رنت على موبايل البواب سمعت جرس الموبايل جايلها من ورا باب الشقة فابتدت تتكلم بصوت عالى وباين عليها الانفعال لو ماقلتش انت مين انا هتصل بالبوليس

فجالها صوت سليم من على السلم وهو بيضحك وبيقوللها يعنى جايلك من اخر الدنيا عشان تبيتينى فى الحجز يا ايمان

ايمان پصدمة سليم سليم وفتحت الباب بسرعة وايدها بتترعش وعيونها بتتدمع وقالت مش معقول مش معقول

سليم وهو بيضحك دخل بسرعة قاللها بقى دى اخرتها برضة عاوزة تحبسينى

كان البواب واقف برة وهو عمال يضحك وهو شايل شنطة سليم فايمان بصتله وقالت بضحك انا هحبس مجدى عشان مشترك معاك فى الچريمة

مجدى بضحك انا عبد المأمور ياست ايمان

ايمان خلاص يامجدى براءة المرة دى

مجدى سابهم وقفل الباب وراه ونزل بعد ماسليم اداله اكرامية كبيرة خلاه مش مصدق نفسه من الفرحة

سليم رجع اخد ايمان فى بشوق كبير وهو بيقوللها وحشتينى ياحبيبتى انا مش مصدق انك اخيرا معايا

ايمان ليه ماقلتليش انك جاى كنت عملت حسابى واستنيتك

سليم حبيت اعملهالكم مفاجأة بس واضح ان أمنية فى سابع نومة

ايمان ما انت عارف بتصحى بدرى عشان الباص بتاعها

سليم لا باص ايه بقى اديها بكرة اجازة وانتى كمان خدى اجازة عاوز اشبع منكم

ايمان بابتسامة للاسف ياحبيبى ماينفعش انت نسيت انها بتمتحن اليومين دول واللا ايه

سليم ياااه تصدقى فعلا نسيت يعنى مش هعرف اقعد معاها بكرة

ايمان بتردد هو انت هتقعد معانا اد ايه المرة دى

سليم بابتسامة انتى عاوزانى اقعد اد ايه

ايمان بتمنى عاوزاك تفضل على طول وماتسافرش تانى ابدا

سليم وهو بيبص فى عيونها طلبات حبيبتى اوامر

ايمان بلهفة بجد ياسليم بجد خلاص كده يعنى مافيش سفر تانى ولا بعد وغربة تانى

سليم وهو بيسحبها ناحية اوضتهم مافيش سفر تانى ومافيش بعد تانى ومافيش غربة تانى

وقت اذان الفجر .. كانت ايمان خارجة من الحمام وبتنشف شعرها وسليم فى السرير بيتفرج عليها وهو مبتسم وقاللها هو انتى بتصحى امنية امتى

ايمان هصلى الفجر واصحيها يادوب عشان الباص مايفوتهاش

سليم قام من السرير وراح ناحية الحمام وهو بيقوللها طب انا هاخد شاور بسرعة وهروح اصحيها بنفسى وكلمى مشرفة الباص ماتعديش عليها انا هوصلها النهاردة بنفسى

ايمان بابتسامة هتنبسط اوى لما هتصحى تلاقيك وكمان تعرف انك هتوصلها بس اعمل

حسابك انك هتوصلنى انا كمان

سليم برضة هتنزلى الشغل وتسيبينى

ايمان مانا قلتلك ياحبيبى ان اليومين دول بالذات ماينفعش اخد اجازة وعشان كده قولتلك لو كنت اديتنى فكرة بمعاد وصولك كنت على الاقل ظبطت امورى

سليم بامتعاض يعنى هتسيبونى لوحدى انتم الاتنين وتنزلوا تانى يوم وصولى يا ايمان

معلش حبيبى هحاول اجى بدرى

سليم طب هقعد لوحدى اعمل ايه بس

ايمان باستغراب وليه تقعد لوحدك انت مش هتروح تسلم على مامتك وباباك

سليم كنت عاوز نروحلهم كلنا سوا

ايمان معلش ياسليم انت فاهم وعارف انه مش هينفع

سليم ماخلاص بقى يا ايمان كبرى دماغك

ايمان اقعد انت ارغى لحد ما البنت تتاخر على الامتحان خلص ياللا على ما اصلى واكلم مشرفة الباص

سليم بقلة حيلة ماشى يا ايمان بس كلامنا فى الموضوع ده بالذات ماخلصش على كده

وسابها وراح على الحمام وهى صلت وراحت على المطبخ تحضر الفطار واللانش بوكس بتاع أمنية

دقايق وسليم خرج من الحمام ونده عليها وقاللها انه رايح يصحى أمنية فسابت اللى فى ايدها وراحت وراه عشان تشوف رد فعل امنية لما تفتح عينها وتلاقى باباها هو اللى بيصحيها

سليم دخل فتح الشباك ينور الاوضة ورجع قفل الازاز من تانى لانهم كانوا فى الشتا فلقى الدنيا لسه مانورتش فقال لايمان ده النهار لسه ماطلعش

ايمان وهى بتنور نور الاوضة ماهى لما بتنزل للباص بيبقى يادوب على معاد الشروق

سليم باعتراض ايه الهبل ده ليه يعنى تنزل بدرى اوى كده

ايمان وهى بتبص للسقف صحى البنت ياسليم عشان ماتتاخرش

سليم بتنهيدة ماشى اما اشوف اخرتها

قرب من امنية ونام جنبها وهو بيقوللها فى ودنها مونى حبيبتى .. اصحى ياللا ياماما عشان معاد الامتحان بتاعك

امنية بنعاس حاضر ياماما بس سيبنى خمس دقايق بس وهقوم على طول

سليم ضحك بعلو صوته وهو بيقول هى ماما بتصحيكى كده كل يوم واللا ايه

امنية التفتت بسرعة وهى بتدعك فى عنيها وقالت بصړيخ بابا انت بجد واللا بحلم

سليم بضحك لا يا ستى بجد قومى ياللا

امنية قامت بسرعة وهى بترمى نفسها فى بفرحة شديدة وايمان كانت واقفة تتفرج عليهم بابتسامة واسعة وبعدين قالتلهم قبل ماتسيبهم وترجع على المطبخ اوعوا فرحتكم ببعض تنسيكم معاد الامتحان

امنية بزعل وهو حبكت يعنى حضرتك تيجى وانا بمتحن مش هلحق اسلم عليك براحتى

سليم لا هتلحقى انا هوصلك للامتحان ولو عرفت كمان هرجع اجيبك بنفسى بس ياللا قومى البسى عشان نلحق نفطر سوا قبل ماننزل

امنية هتوصلنى بايه

سليم بالعربية هوصلك بتوكتوك مثلا يعنى

امنية هى ماما مش هتروح الشغل

سليم وهو بيشدها يقومها لا مانا هوصل ماما بعد اما اوصلك وياللا بطلى رغى وعلى الحمام ولما تخلصى لبس تعالى بسرعة عشان نفطر

امنية وهى رايحة ناحية الحمام ماشى

سليم رجع على اوضته بعد ما

—

اخد شنطة من شنطه وفتحها وطلع لبس ليه غير هدومه وراح على المطبخ لقى ايمان خلصت وقالتله انا هروح البس على ما امنية تيجى انا عملتلك القهوة

سليم بابتسامة تسلم ايدك ياحبيبتى بجد بجد قهوتك وحشتنى جدا

ايمان سابته وراحت على اوضتهم عشان تغير هدومها اول مادخلت الاوضة لقت سليم مبهدل الدنيا بشنطته لما فتحها فاتنهدت وغيرت هدومها ووضبت السرير وسابت كل حاجته زى ماهى ورجعتلهم على المطبخ لقت امنية هى كمان خلصت وقاعدة بترغى مع باباها

سليم وانتى برضة بتنزلى بدرى اوى كده زيها

ايمان لا طبعا انا عشان نازلة معاكم ومدت ايدها لسليم بميدلية مفاتيح فيها مفتاحين وفلاشة وقالت دى مفاتيح البوابة اللى تحت وباب الشقة وفلاشة الاسانسيرعشان لو قررت انك ترجع على هنا

سليم طب ياللا اقعدى افطرى احنا خلصنا اكل

ايمان انت نسيت انى مابفطرش

سليم وهو بيبصلها بتركيز ايه ده تصدقى معلش حقك عليا طب ياللا بينا

ايمان طلعت ميداليتها وخرجت مفتاح العربية واديتهوله وقالت مفتاح العربية

سليم بضحك الظاهر ان قلة النوم مش مخليانى مركز

ايمان بجدية طب ماتخليك انت ونام على مانرجع او لحد ماتشبع نوم وتقوم

سليم لا .. ياللا انا وعدت مونى انى اوصلها

امنية بس لو حضرتك تعبان فعلا يابابا خليك انت ونام وماما توصلنى

سليم قلت لا ياللا

نزلوا كلهم مع بعض وسليم وصل امنية على مدرستها وقاللها انه هيرجع ياخدها ويروحو مع بعض يجيبوا مامتها من البنك

وبعد كده وصل ايمان وقاللها انه هيروح

يسلم على باباه ومامته وبعد كده هيرجع يجيب امنية ويعدوا عليها عشان يروحوا مع بعض

سليم راح على بيت باباه ومامته اللى كان فى حى مصر القديمة كان بيت من البيوت القديمة العريقة بتاعة زمان ورغم ان البيت قديم لكن كان بيت من دورين بس وفخم وحواليه جنينة صغيرة وسور ببوابة خاصة بيه

سليم لما وصل رن جرس البوابة الخارجية لانها كانت مقفولة بالمفتاح وبعد ما رن الجرس مرتين مامته بصت من شباك الدور الارضى ولما لقته قالت بصوت عالى سليم ياحبيبى انت جيت امتى

سليم بابتسامة لسه من كام ساعة بس ايه ماحدش هيفتحلى واللا ايه

مامته قفلت الشباك وبعد دقيقة واحدة خرجت فتحتله الباب الخارجى

سليم اخدها تحت جناحه ودخل لقى باباه جاى عليه وسلم عليه بشوق وفرحة كبيرة جدا وبعد ماقعدوا

باباه حمدلله على السلامة ياحبيبى جيت امتى ياسليم

سليم لسه من كام ساعة ويادوب وصلت امنية لمدرستها ووصلت ايمان الشغل وجيتلكم

مامته وهى بتمصمص شـ,ـفايفها قول كلام غير ده بقى هتبقى جاى من كام ساعة ومراتك وبنتك هيسيبوك وينزلوا برضة

سليم انا اصلى جيت فجأة وامنية عندها امتحانات وايمان مش عاملة حسابها تغيب

مامته ااه طبعا ماهى عاملة روحها الست المهمة المشغولة

باباه وبعدهالك يا عزيزة مالوش لزوم الكلام ده دلوقتى

عزيزة ليه يعنى يا محمود ماهو لازم يبقى عارف انها عاملة علينا قاييمة ومابنشوفهاش غير فى المناسبات

محمود لا حول ولا قوة الا بالله سيبك منها يابنى وطمننى عليك اخبارك ايه

سليم بتنهيدة الحمدلله يا ابويا بخير

عزيزة كانت بتبص لسليم وبعدين قالت له بمكر وانت بقى لسه جاى امبارح بجد واللا جاى من زمان والهانم كانت مانعاك تجيلنا

سليم باستغراب وهتمنعنى اجيلكم ليه بس ده انا حتى لما قلتلها انهم هينزلوا ويسيبونى لوحدى هى اللى قالتلى انى اجى اسلم عليكم على ماهم يرجعوا اخر اليوم

عزيزة وهى بتمصمص شـ,ـفايفها ااه طبعا عشان ماتجيش معاك ده حتى ماحدش بيعرف يمشى كلمة على بنتك كل حاجة تقول ماينفعش ماينفعش زى مانكون هناكلها واللا اكن هى بس اللى بتفهم فى الدنيا دى واحنا كلنا بهايم

سليم بفضول انا نفسى اعرف هى عملتلك ايه بس عشان تكرهيها بالشكل ده

عزيزة باندفاع هتعمل ايه اكتر من اللى عملته

سليم ايوة اللى عملته اللى هو ايه بقى

عزيزة بحسرة خدتك وغربتك حرمتنا منك ومابقيناش نشوفك ولا نعرف عنك حاجة الا كل فين وفين

سليم هو انتى ليه مش مصدقة ان ايمان مالهاش اى علاقة بقرار سفرى ده وان انا اللى قررت ده عشان اقدر اعمل المشروع اللى نفسى فيه من زمان

عزيزة وهى بتشاورله بضهر ايدها هبلة انا بقى ده احنا جبنالك الشقة وجوزناك من غير ماتبقى مديون بجنية واحد كان ايه اللى ناقصك عشان تتغرب السنين دى كلها غير بس هى اللى طماعة ومابيملاش عينها غير التراب والنبى تسكت

محمود لا حول ولا قوة الا بالله قوللى يابنى فطرت واللا لسه

سليم بقلة حيلة ايوة يا ابويا فطرت الحمدلله

محمود اومال مالك همدان كده

سليم ابدا بس عشان مانمتش من امبارح

عزيزة بسخرية ومانمتش ليه ياضنايا

سليم مانا بقوللك يا ماما انى لسه واصل بالليل ومتأخر كمان

عزيزة بغيظ وماكانت تسيبك تستريح يعنى ماحبكتش عموما انا هعمللك اكلة ترم عضمك من الغربة اللى كنت فبها هقوم اعمللك محشى وبط زمانك مادوقتش الحاجات دى من ساعة ماكنت فى مصر اخر نوبة والمعدلة مراتك تلاقيها هتقوللك انا مشغولة والبنك وابصر ايه وتقضيهالك نواشف كل يوم

محمود بغيظ ياولية اهمدى شوية وقومى اعملى فنجان قهوة لابنك

واللا تحب تقوم تناملك ساعة واللا حاجة يابنى

سليم لا يا ابويا مش هينفع العربية معايا والمفروض هروح اجيبهم عشان نروح سوا

عزيزة قوم قوم ناملك شوية وهبقى اصحيك على الاقل تبقى فايق وانت سايق

سليم لا مش لازم هو فنجان قهوة هيبقى تمام

عزيزة بتصميم خلى القهوة لما تصحى ياللا قوم ادخل اوضتك متنضفة وزى الفل على ما اختك تنزل من فوق تكون نمتلك شوية

سليم قام وقال ماشى بس هى ساعة او ساعتين بالكتير وصحينى اوعى تسيبينى نايم

عزيزة طيب ياللا ادخل انت نام

سليم اول ما دخل وحط جسمه على السرير كان راح فى سابع نومة ومحمود قام وقال انا هلبس

واوصل لغاية البنك وهرجع على طول ان شاء الله بس اوعى تنسى تصحى ابنك عشان مايتأخرش عليهم

عزيزة بامتعاض ماخلصنا يعنى هيتاخر على البرنسيسة

محمود سابها ومشى وهو بيستغفر وراح لبس وخرج

كان وقتها الساعة حوالى عشرة ونص الساعة اتنين ونص محمود رجع من برة لقى عزيزة فى المطبخ ومعاها سامية بنتها واللى ساكنة فى الشقة اللى فوقيهم على طول هى وجوزها لان سليم لما قرر يتجوز بعيد عن بيت العيلة عزيزة صممت ان سامية تتجوز معاها فى البيت

سامية كانت نسخة من عزيزة شكلا ومضمونا وكانوا مشتركين مع بعض فى عدم حبهم لايمان عزيزة عشان حاسة انها خدت منها ابنها وسامية لانها بتغير منها على جوزها ابراهيم لانها كانت دايما بتشوف نظرات الاعجاب فى عيون جوزها لايمان

محمود السلام عليكم

عزيزة وسامية ردوا السلام وبعدين عزيزة قالت اتأخرت يعنى مش قلت هتيجى على طول

محمود البنك كان زحمة اوى كنت فاكر انى هلحق سليم قبل مايمشى

سامية يمشى فين سليم نايم جوة

محمود بلهفة نايم هو انتى ماصحيتيهوش ياعزيزة

عزيزة ببرود صعب عليا قلت اسيبه شوية

محمود وهو رايح ناحية اوضة سليم وبنته ومراته اللى مستنيينه دول يعملوا ايه

سامية ببرود وكانوا

—

بيعملوا ايه يعنى وهو مسافر

محمود پغضب هو انتو مافيش فايدة فى السواد اللى جواكم ده وقعد ينده على سليم ويصحيه وهو بيقول له قوم يابنى الحق بنتك ومراتك الساعة داخلة على تلاتة

سليم اتنفض من مكانه ولبس جزمته وهو بيقول ايه .. تلاتة ليه يا ابويا سيبتونى اتاخر عليهم كده

محمود باعتذار حقك عليا يابنى انا اتاخرت فى البنك وفكرت انى هاجى الاقيك مشيت

سليم اخد مفاتيحه وجرى على العربية من غير مايسلم على امه واخته اللى كانوا فى المطبخ

عزيزة بغيظ وهى خارجة من المطبخ اتفضل اهو حتى مافكرش يقول سلام عليكم وهو ماشى بيجرى عشان يلحق الحلوة بتاعته قبل ماتعلق له المشانق ياخيبتك فى ابنك ياعزيزة

سامية الا حتى ماقاللى ازيك يااختى

محمود بزعيق هو انتو تعملوا العملة وكمان بتشتكوا هو مافيش فايدة فى غباكم ده

سامية بامتعاض انت بتزعقلى ليه يابابا

محمود عشان سودة من جواكى عشان قلبك ماكلكيش على بنت اخوكى وهى مرمية فى المدرسة لوحدها مستنية ابوها وهو متأخر عليها

سامية بسخرية بنت اخويا اللى بتحبنى وبتسأل عليا كل يوم

محمود مين اللى يسأل على مين انتى الكبيرة وعمتها واخوكى فى الغربة وبنت اخوكى دى طفلة يبقى هى برضة اللى المفروض تسال عليكى مش مكسوفة من نفسك بذمتك اخر مرة رفعتى فيها السماعة سالتى عليها واللا على ايمان كان امتى

سامية بغيرة وماتسألش هى ليه احسن منى فى ايه هى

عزيزة فتنالك انت السؤال ياحنين ما انت كل يوم والتانى بتكلمهم وكمان يوم الجمعة حارمنا منك وعلى طول بتتغدى معاهم

محمود بقلة حيلة انتى زعلانة عشان بتغدى معاهم يوم لا حول ولا قوة الا بالله انتو الكلام معاكم مابيجيبش غير ۏجع القلب والضغط

سليم وصل المدرسة عند بنته متاخر حوالى ساعة وشوية ولقاها معيطة وقلقانة وكلمت مامتها كذا مرة تسالها عن باباها

معلش يامونى حقك عليا ياحبيبتى انا بس راحت عليا نومة ومامعاييش لسه خط مصرى كنت كلمتكم عليه كلمى ماما قوليلها انى وصلتلك

أمنية ماما زمانها جاية اصلا اتخضت اوى لما عرفت انك لسه ماجيتليش

سليم اخد فون أمنية واتصل على ايمان اللى ردت بلهفة خلاص يا أمنية انا قدامى خمس دقايق بالظبط حبيبتى وهبقى عندك ماتخافيش بابا بس اتأخر شوية وهيجيلنا على طول

سليم بكسوف انا جيت خلاص يا ايمان

ايمان بلهفة انت كويس ياسليم وعمى وطنط بخير

سليم ااه ياحبيبتى انا بس راحت عليا نومة عندهم

ايمان بتنهيدة الحمدلله انا خفت اكلم عمو محمود اخضه انا عموما دقيقة واحدة وهبقى قدامكم

سليم على ما قفل التليفون وركب امنية العربية لقى ايمان وصلت بعد ماحاسبت التاكسى راحت ناحيتهم وركبت جنب سليم وهى بتضحك وبتقول هدفعك تمن التاكسى وبالعملة الصعبة

سليم بضحك لو جت على اد كده بسيطة

ايمان بتريقة ماقلتلك خليك ونام

سليم ياللا معلش الحمدلله جت سليمة

رجعوا على البيت ايمان دخلت غيرت هدومها وغسلت وشها وراحت على المطبخ وابتدت تحضر الغدا

امنية عملت نفس القصة وحصلت مامتها عشان تساعدها فسليم قال بامتعاض ايه ده هو انتى

لسه هتبتدى تطبخى دلوقتى

ايمان بهزار انت الغربة نستك النظام واللا ايه واللا عشان كنت باخد اجازة الاسبوعين اللى بتبقى فيهم هنا وماكنتش بتشوف المناظر دى بس عموما ماتقلقش الاكل هيبقى جاهز مسافة نص ساعة

سليم زمان غير دلوقتى يا ايمان لازم تشوفيلك حل فى الحكاية دى

ايمان بقلة حيلة هعمل ايه بس ياسليم اديك هتبقى موجود معانا وهتشوف ولو لقيتلى حل ايدى على كتفك

سليم سكت بامتعاض وفضل قاعد مستنيها تخلص غدا رغم انه انشغل شوية بكلامهم عن الامتحان بتاع امنية وحلت ازاى وهتمتحن تانى امتى

ايمان كانت عاملة بانية ومكرونة وكانت محضرة كل حاجة من اليوم اللى قبله فكان يادوب على التطبيق وعشان كده مااخدتش وقت

على الغدا سليم بص للاكل بسخرية وقال هى دى فكرتك عن الاحتفال بجوزك اللى راجع بعد غيبة اربع سنين

ايمان بتهريج جوزى اللى جالنا على غفلة من غير معاد مسبق

سليم هو انا المفروض اخد معاد منك قبل ما اجى واللا ايه

ايمان لاحظت ان سليم زى مايكون عاوز يتخانق فقالت له لابتسامة انا بهزر معاك ياسليم ما اقصدش حاجة

سليم وهو بيبتدى ياكل تبقى تاخدى بالك يا ايمان واعملى حسابك انا بكرة عاوز اكل محشى وبط

ايمان حاضر ياسليم بس ممكن يوم الجمعة بلاش بكرة

سليم واشمعنى يعنى

ايمان اولا لان مافيش وقت ثانيا لانى لسه هشترى الحاجات دى لانها مش عندى وتوضيبها بياخد وقت وزى ماقلتلك مش هينفع اخد اجازة الاسبوع ده بس انا قدمت على اجازة الاسبوع اللى جاى ان شاء الله

سليم بامتعاض وانتو مقضينها نواشف طول الاسبوع واللا ايه

ايمان بضحك وهو البانية نواشف يا سليم

سليم ااه طبعا نواشف

ايمان ماشى ياسيدى بس عموما لا مش مقضيينها نواشف ولا حاجة يعنى بعرف امشيها ماتقلقش يعنى ساعات بطبخ وساعات نواشف زى مابتقول وساعات بنجيب اكل جاهز .. يعنى

سليم اممممم ولما بتطبخى بقى برضة بتطبخى بعد مابترجعى من الشغل

ايمان مش دايما ساعات ببقى مجهزة حاجات من بالليل وساعات فعلا بعد مابرجع

سليم عموما هنشوف الكلام ده

أمنية بابا هو حضرتك جبتلى اللاب توب اللى طلبته منك واللا نسيت

سليم بابتسامة جبته طبعا انا اقدر انسى برضة

ايمان وهى بتحذر امنية مبروك ياست امنية بس اعملى حسابك مافيش لابتوب غير بعد الامتحانات ماتخلص

سليم اشمعنى يعنى

ايمان بدهشة هو ايه اللى اسمعنى عشان المذاكرة طبعا

سليم وهى يعنى هتقعد تذاكر طول اليوم

ايمان لا طبعا بس لو ابتدت تستعمل اللاب دلوقتى هتنشغل بيه جامد وهيضيع وقتها

سليم بلا مبالاة ولا هيضيع وقتها ولا حاجة ماتحبكيهاش اوى كده وسيبيها تنبسط

ايمان مارضيتش تعارضه قدام امنية فسكتت وبعد الغدا قالت لامنية روحى ريحى شوية وهبقى اصحيكى عشان تشوفى اللى وراكى

سليم استنى يا امنية لما اوريكى انا جبتلك ايه

امنية بفرحة جبتلى ايه

سليم حاجات حلوة كتير تعالى اوريهالك على ما ماما تعمللى الشاى

واخد امنية وراح على اوضته ولما لقى شنطته زى ماسابها الصبح والحاجات متبهدلة حواليها نده على ايمان بزعيق وقاللها ايه يا ايمان المنظر ده ليه الدنيا مبهدلة كده

ايمان وهى بتحاول تمسك اعصابها انا خفت اشيل حاجة من مكانها احسن الخبطلك حاجة

سليم وهو لسه بيزعق وايه اللى هيتلخبط يعنى دول شوية هدوم واللا برضة هتقوليلى الشغل ومش فاضية

ايمان حست انه مشحون عليها جدا فحاولت انها تلم الموضوع فقالت لا طبعا شغل ايه انا هشطب المطبخ واجى افضيلك شنطتك حاضر

سليم يعنى هنقعد فى المنظر ده على ماتشطبى المطبخ

ايمان دخلت ومدت ايدها وابتدت تلم الحاجات اللى هو بهدلها وهى بتقول لا ياسيدى ماتزعلش هلمهملك دلوقتى

سليم حطيتى الشاى فين

ايمان بذهول شاى ايه هو انا لسه حتى لمېت الاكل

سليم ما انتى عارفة انى لازم اشرب الشاى اول مااخلص اكل

ايمان وقفت والهدوم بين ايدها وقالت ماهو انا فى منى نسخة واحدة على فكرة يعنى يا اعمل الشاى يا الملك حاجتك اللى انت بهدلتها يا الم السفرة واغسل

—

المواعين

سليم بزهق روحى اعمل الشاى يا ايمان وابقى لمى الكلام ده بعدين وامرى لله

ايمان بقت تبص له وهى مذهولة وبعدين خرجت وهى بتخبط كف على كف سليم الټفت لامنية لقاها حاطة ايدها على بفها وعمالة تضحك جامد فقاللها باستغراب بتضحكى على ايه

امنية عليك وانت هتجنن ماما

سليم اجننها

امنية

ااه طبعا لما بتطلب حاجات كتير اوى فى نفس الوقت وهى مش عارفة انت عاوز ايه

سليم طب تعالى يالمضة لما اطلعلك حاجتك

سليم بهدل الدنيا زيادة وطلع اللاب وحاجات تانية كتير من شنطته اداها لامنية وخرج جاب شنطة تانية فتحها وطلع منها حاجات اكتر

امنية كانت فرحانة جدا بالحاجات اللى باباها جابهالها وابتدت تاخدهم على اوضتها حاجة فى حاجة ووسط كل ده ايمان كانت عملت الشاى لسليم ولمت السفرة وغسلت المواعين وراحت على اوضتها اڼصدمت لما شافت المنظر لقت الدنيا اتبهدلت اضعاف ماكانت لان سليم فتح كل الشنط وطلع معظم اللى فيها

ايمان بقت عمالة تستغفر وتحوقل جواها وهى ساكتة عشان ماتعملش المشكلة المعتادة من سنين مع سليم اللى بتحصل كل مايرجع من عند مامته ورتبت كل الهدوم بتاعته فى الدولاب ومابقاش فاضل فى الشنط غير الهدايا والرفايع بتاعته واوراقه فخرجت قالتله اشيللك الاوراق بتاعتك فين ياسليم

سليم اتنطر من مكانه وقال لها بخضة ماتشيليش حاجة اوعى تكونى لعبتى فيهم

الفصل التانى

ايمان باستغراب لا مالعبتش فى حاجة ماتخافش هتلاقيهم زى ماهم خلاص روح شوف هتشيلهم ازاى

سليم دخل الاوضة لقى ايمان فعلا شالت كل اللى كان موجود مافضلش غير فعلا الاوراق والهدايا فنده عليها بعد ماشال الاوراق وعانها بمعرفته وقاللها ماشيلتيش الهدايا ليه كمان

ايمان هسيبها فى الشنطة وهقفل عليهم على ماتروح لاصحابها

سليم وماشيلتيش حاجتك منهم ليه

ايمان عشان مااعرفش ايه اللى يخصنى وايه لا

سليم اللى يعجبك خوديه

ايمان يعنى انت مش جايبلى حاجة اسبيشيال باسمى

سليم بتردد الصراحة لا بس جيبت حاجات كتير وقلت تختارى اللى يعجبك

ايمان اللى يعجبنى اللى يعجبنى واللا هترجع تقوللى لا اصل دى بتاعة ماعرفش مين ودى جايبها لمين

سليم لا الحاجات اللى بالاسم مكتوب عليها اصحابها اما الباقيين فشوفى اللى يعجبك خوديه

ايمان وهى راحة ناحية الهدايا انا حقيقى الحمدلله مش ناقصنى حاجة بس هو لو كده انا ممكن اخد التابلت ده هينفعنى فى شغلى جامد

سليم لا شغل ايه اللى محتاجاه للشغل ده الشغل هو اللى يجيبهولك مش انا انا بقوللك شوفى انتى عاوزة ايه ليكى مش للشغل

ايمان اتضايقت من جواها بس قالتله عموما ياحبيبى تعيش وتجيب وزى ماقلتلك انا مش محتاجة حاجة شوف انت عاوز تدينى ايه واديهولى زى ماعملت مع امنية كده

سليم طب خلاص لما افرز الحاجة هبقى اطلعلك منهم الحاجة اللى تناسبك

ايمان قالتله ماشى هروح ابص على امنية

ايمان راحت بصت على امنية لقتها شغلت اللاب توب وحملت عليه العاب وقاعدة تلعب عليه فدخلت وقفلت الباب عليهم وقالتلها بصوت واطى عشان سليم مايسمعش حبيبتى مش كفاية كده انت ناسية ان عندك امتحان بكرة يعنى لازم تستعدى وكمان تاخدى كفايتك من النوم

امنية خلاص يا ماما انا هشيل الحاجات دى وهقعد اذاكر

ايمان وياريت مايطلعوش تانى لغاية مانخلص الامتحانات يا امنية وهانت ياحبيبتى ده هم تلات ايام ونخلص وفى اجازة نص السنة اعملى كل اللى انتى عاوزاه

امنية ماشى

ايمان طب قومى ياللا شوفى اللى وراكى وانا هلملك الحاجات دى واعينهالك

ايمان ابتدت تلم حاجة امنية لقت سليم جايبلها غير اللاب هدوم بيت وهدوم خروج والعاب وحتى جايبلها مكياج بمستحضرات طبيعية عشان بشړة الاطفال

على اد ماكانت مبسوطة بانبساط بنتها على اد ما كانت متضايقة انه مافكرش يجيبلها حاجة اسبيشيال زى الباقيين

لكن قررت ماتعلقش وبعد ماخلصت ترويق حاجة امنية سابتها تذاكر وخرجت راحت ناحية اوضتها لقت سليم جايب شنطة هاندباج وبيحط فيها الهدايا بتاعة باباه ومامته واخته ولقته حط التابلت اللى كان عاجبها مع الهدايا دى فماعلقتش وقالتله انا هعمل ليا قهوة اعمللك معايا

سليم وانتى ليه تشربى قهوة متاخر كده

ايمان مش متاخر ولا حاجة وعموما انا متعودة اشربها فى المعاد ده كل يوم ها .. اعمللك معايا

سليم اعمليلى هى امنية نامت واللا ايه مش سامع حسها

ايمان بتذاكر

سليم لحقت تشبع من الحاجات اللى جايبهالها

ايمان ما انا اتفقت معاها تشيلهم على ما تخلص امتحانات

سليم بتهكم هى يعنى فى الثانوية العامة

ايمان لا فى الاعدادية ياسلبم واللا نسيت

سليم ماتعقديهاش يا ايمان وسيبيها تشم نفسها ماتبقيش على طول خانقاها كده

ايمان بغيظ ومين قاللك بقى انى خانقاها هى اشتكتلك واللا ده اجتهاد شخصى منك

سليم ما انتى اخدتى

منها الحاجة وعينتيها اهوه

ايمان بذهول اخدت منها الحاجة انا ماخدتش حاجة انا طلبت منها تشيلهم عشان بتمتحن وهى وافقت انت بقى زعلان ليه ايه مشكلتك انا مش فاهمة

سليم مشكلتى انك بتتعاملى اكنك بتتعاملى فى الشغل وناسية انك هنا مش اكتر من ام و زوجة

ايمان بصتله اوى وهى عاقدة حواجبها وبعدين هزت راسها وسابته ومشيت على المطبخ

سليم راح وراها وقال لها اعملى حسابك اخر يوم فى الامتحانات هنروح نتغدا عند ماما وهتيجى معايا

ايمان بغيظ من جواها ان شاء الله يا سليم رغم انك عارف رأيى فى الموضوع ده لكن حاضر عشان ماتزعلش هاجى معاك

سليم ومش عاوز مشاكل

ايمان انت عارف ومتاكد انى عمرى ماعملت مشاكل بدليل اهوه انا ماروحتش معاك واديك برضة من ساعة مارجعت وانت بتحاول تتصيدلى اى اخطاء

سليم ببعض الڠضب ليه مچنون انا واللا عيل صغير هيقلبونى عليكى

ايمان بزهق اسمع ياسليم انا عمرى ما اشتكيتلك من حد من اهلك ولا عمرى قلتلك طنط عملت واللا اختك سوت ومن يوم ما اتجوزنا وانا بحاول ما ابقاش مصدر اى مشاكل وكل اللى قدرت اعمله انى كنيت روحى عنهم لكن برضة ماعجبتش بس قلت مش مشكلة طالما بعدت عن المشاكل بس مش معنى كده انك كمان تحملنى فوق طاقتى

سليم بسخرية وايه هى طاقتك دى

ايمان اسمع ياسليم انت لغاية ماكنت نازل الصبح عشان توصلنا كنت سايبنى براحتى لانك عارف ومقتنع انى عندى حق ورغم كده قررت انك تودينى هناك رغم ارادتى ورغم ذلك انا ما اعترضتش وقلتلك حاضر يبقى على الاقل ماتعملليش ضغط على اعصابى بكلام ماممنوش اى لزمة

سليم كل المحاضرة دى عشان قلتلك مش عاوز مشاكل

ايمان بزهق انا اللى مش عاوزة مشاكل ياسليم انت لسه واصل بالليل ارجوك بلاش نعمل مشكلة من مافيش قلتلى على اللى انت عاوزه وانا قلتلك حاضر خلاص بقى خلينا نتكلم فى حاجة مهمة احسن من الكلام اللى مش هيقدم ولا هيأخر ده

سليم وايه بقى الحاجة المهمة دى

ايمان كانت خلصت القهوة حطتهم على صينية وخرجت راحت ناحية الريسبشن وحطتهم وقعدت وهى بتقول يعنى مثلا ناوى على ايه او ايه اللى فى دماغك حاطط مشروع معين فى راسك واللا لسه هتدور واللا ايه بالظبط

سليم فى كذا حاجة فى دماغى بس لسه ما اخدتش قرار

ايمان طب

—

كونت اد ايه عشان نقدر نوجه تفكيرنا صح

سليم يعنى مبلغ كويس

ايمان من يوم سليم ماسافر وهى ماتعرفش عن مادياته اى حاجة ودايما مابيديهاش اجابة واضحة فى الموضوع ده بالذات

ايمان كويس دى مش معيار ياسليم ممكن يبقى كويس بالنسبة لمشروع ومش كويس لمشروع تانى وعشان كده انا سؤالى محدد المبلغ اللى معاك اد ايه

سليم بحدة ماقلتلك كويس يا ايمان وخلاص ماتقعديش ترغى بقى

ايمان ببعض الزعل ماشى براحتك عموما ربنا يوفقك وابتدت تشرب القهوة بتاعتها من غير ماتتكلم تانى

سليم بصلها بجنب عينه وقاللها هو باباكى ومامتك عاملين ايه

ايمان الحمدلله بخير

سليم بتزوريهم

ايمان فى المناسبات هم اللى بييجوا يبصوا علينا مرة كل اسبوع او عشر ايام

سليم وليه ماكنتيش بتروحيلهم

ايمان بصتله بتركيز وقالتله عشان ماتعملليش المقارنة اللى كنت ناوى تعملهالى دلوقتى ياسليم

سليم وهو بيشرب القهوة مقارنة ايه دى

ايمان كانت خلصت قهوتها فقامت وهى بتقول له هبص على امنية واسالها لو محتاجة حاجة

بعد مامشيت سليم بصلها بجنب عينه بخبث وقام راح ناحية اوضتهم ودخل وقفل عليه الباب وراح ناحية شنطة الاوراق بتاعته طلع اوراق التحويل حطها فى محفظته وشالها فى جاكت بدلته ورجع خرج تانى من الاوضة لقى ايمان خارجة من عند امنية ورايحة ناحية المطبخ

سليم امنية خلصت واللا لسه

ايمان قربت هعمللها سندوتش عشان تتعشى قبل ماتنام

سليم هى بتنام بدرى كده

ايمان بتريقة ما البدرى ده كان متاخر من شوية على القهوة

سليم دى غير دى

ايمان ماتنساش انها بتصحى من الفجر فيادوب بتصلى العشا وبتنام على طول

سليم ده ايه الملل ده لا الكلام ده ماينفعش

ايمان وياترى شايف ايه اللى ينفع

سليم تنام على عشرة حداشر كده مش من العشا زى العواجيز

ايمان باستغراب انت زعلان ان بنتك عايشة حياة صحية بيحسدها عليها امهات وابهات كتير جدا

سليم بلا صحية بلا ملوخية بلاش كلاكيع

ايمان مش ملاحظ انك

من ساعة مارجعت من برة وانت مابتعملش غير انك بتعارض اللى انا بعمله وبس

سليم لو اللى بتعمليه صح ماكنتش اتكلمت

ايمان بصتله بتركيز وقالتله وياترى ياسليم ايه اللى انا بعمله و انت شايفة

غلط

سليم وهو رايح ناحية الليفنج لا دى محتاجة قاعدة

ايمان كملت ناحية المطبخ وماعلقتش على كلامه وعملت سندوتش لامنية وحطتلها معاها كوباية لبن وحطيتهم على صينية ووديتهم على الليفنج وندهت على امنية عشان تاكل ورجعت على المطبخ تانى

امنية لما خرجت من اوضتها وقعدت فى الليفنج اخدت الصينية حطتها على رجلها وابتدت تاكل السندوتش وهى بتتفرج على التليفزيون

سليم بتريقة ايه ده هو مسموحلك انك تاكلى فى الليفنج وقدام التليفزيون كمان

امنية وهى مش فاهمة حاجة عادى يا بابا انا كده كل يوم

سليم وهو لسه بيتتريق كل يوم ده ايه التقدم ده لا والله فيه امل

ايمان خرجت من المطبخ وهى عاملة سندوتشات حطيتها قدام سليم وقالت دى عشان لو جعت

سليم وانتى مش هتاكلى

ايمان وهى بتقعد انا مابتعشاش

سليم ليه عاملة ريجيم

ايمان بصت لسليم بابتسامة سخرية وقالت من وانا عندى خمستاشر سنة مابتعشاش ياسليم

سليم افتكر ان فعلا ايمان عمرها ما اتعشت معاه من يوم جوازهم فاتنحنح باحراج وقال مافيهاش حاجة يعنى لو كسرتى القاعدة مرة واتعشيتى معايا

ايمان معلش عشان معدتى ماتتعبش

امنية خلصت وقامت راحت المطبخ غسلت الحاجة اللى اكلت فيها وخرجت راحت على الحمام غسلت ايدها وسنانها ورجعت لايمان وهى بتقول لها انا خلاص هنام تصبحى على خير وراحت ناحية سليم وقالتله شكرا على الحاجات الحلوة اللى جبتهالى تصبح على خير

سليم ماتقعدى معايا شوية مش لازم يعنى تنامى دلوقتى

امنية بصت لايمان لقتها باصة فى الارض وما اتدخلتش معاهم فى الحوار وسليم لاحظ انها عاوزة تاخد الاذن من مامتها فقال لها لو عاوزة تقعدى اقعدى ماتخافيش الدنيا مش هتخرب يعنى لو سهرتيلك يوم ولو حابه تجيبى اللاب تقعدى عليه شوية لحد ماتنامى

امنية فرحت جدا بكلام باباها وقالتله بفرحة بجد يا بابا

سليم بضحك طبعا بجد اومال جايبهولك عشان تحنطيه

امنية جريت على اوضتها وبعد ثوانى رجعت باللاب وقعدت وفتحته وقعدت جنب باباها وقعدت تفرجه على الحاجات اللى نزلتهم عليه

ايمان كانت قاعدة متضايقة جدا من اللى بيحصل بس قررت تسيبهم يعملوا اللى هم عاوزينه وبعد شوية قامت وقالتلهم وهى رايحة ناحية اوضتها تصبحوا على خير

سليم باستغراب هو انا هقعد امنية تقومى انتى تنامى

ايمان من غير ماتلتفتلهم انا بصحى من قبل الفجر ومانمتش امبارح لو انت اخدت بالك

سليم طب وايه يعنى مانا كمان .

ايمان التفتتله وقالتله انت كمان ايه انت نمت عند باباك واللا نسيت وكمان اناعندى شغل بدرى

سليم نفخ وقاللها هو انتى برضة ما اخدتيش اجازة

ايمان انا اتفقت معاك انى هاخد الاجازة الاسبوع اللى جاى ياسليم

سليم بصوت عالى وليه مش بكرة انا عاوز افهم ايه المهم اوى اللى يخليكى مش عاوزة تاخدى اجازة يعنى ياست المهمة

ايمان بقت عمالة تبصله وتبص لامنية اول مرة يختلفوا قدامها وحاولت تنبه سليم انه يوطى صوته او على الاقل ياجل كلامه ده لوقت تانى لكن سليم برغم انه فهم هى عاوزة ايه لكن صمم يكمل زعيقه وقال دى اول حاجة لازم تتغير انا شغلك ده مش عاجبنى ولازم تسيبيه

ايمان بصتله باستغراب شديد جدا بس مسكت اعصابها وقالتله بهدوء ممكن نتكلم فى اوضتنا بعد اذنك

سليم بصلها وبص لامنية اللى كانت بتبصلهم بقلق وشاورلها بايده ناحية الاوضة وقال ماشى اتفضلى

ايمان سبقته على الاوضة وقعدت على السرير وهو دخل وراها وقعد جنبها وقاللها انا شايف ان كفاية شغل لغاية كده

ايمان وهى بتحاول ماتتعصبش بس انا بحب شغلى ياسليم ومش عاوزة اسيبه

سليم ليه يعنى عمللك ايه شغلك ده عشان تتمسكى بيه للدرجة دى

ايمان پصدمة عمللى ايه انا بقيت مدير ادارة واللا نسيت

سليم باستخفاف وافرضى ايه يعنى برضة مامنوش فايدة

ايمان دلوقتى مامنوش فايدة شغلى ده اللى كان فاتح البيت طول السنين اللى فاتت عشان انت تقدر تكون نفسك

سليم اتنرفز وقام وقف وقال انتى هتعايرينى ان انتى اللى كنتى بتصرفى على البيت وانا مسافر واللا ايه

ايمان انا مابعايركش انا برد على كلامك ياسليم ثم انت لسه راجع ولسه مش عارف

هتعمل ايه ولا حتى عاوز تشركنى معاك فى حاجة يبقى عاوزنى اسيب شغلى دلوقتى بانهى منطق

سليم سكت اكنه بيعقل الكلام فى دماغه وبعدين قاللها طب لو سيبتك دلوقتى عشان انتى عاوزة كده وقت ما اطلب منك تسيبيه هتسيبيه

ايمان بتصميم بص ياسليم عشان مانختلفش تانى بسبب الحكاية دى سيابان شغل .. انا مش هسيب

سليم يعنى ايه

ايمان يعنى انا فى شغلى ده بقالى اكتر من ١٧ سنة وبكبر وبترقى وباخد وضعى ده انا مترشحة انى ابقى مدير فرع فى الترقية الجاية

سليم بس انا مش حابب ان مراتى تكون بتشتغل

ايمان قعدت تضحك جامد وبعدين قالت له هو انت بتتقدملى وبتحط شروطك ياسليم حبيبى احنا متجوزين من ١٥ سنة النهاردة واتجوزتنى وانا بشتغل فى البنك واللى انت كمان بالمناسبة كنت بتشتغل

—

فيه قبل سفرك فاكر واللا نسيت

سليم بضيق مانسيتش ومانسيتش انك كنتى تعيين وانا يومية حتى بعد ما اتجوزنا رغم ان انا الراجل مش انتى

ايمان اول مرة تحس بغيرة فى كلام سليم فقالتله الحكاية مالهاش اى علاقة براجل وست الحكاية كانت فرق تقدير التخرج واللا نسيت

سليم لا ياستى مانسيتش وادينى سيبتهولك خالص

ايمان بدهشة سيبتلى ايه انت ليه محسسنى انى كنت بنافسك على مكانك واخدته منك بدون وجه حق

سليم وهو بينفخ بلا حق بلا باطل انا بقوللك انى وقت ما اقوللك تسيبى شغلك تسيبيه

ايمان قررت ماتردش عليه لغاية ماتعرف هو ناوى على ايه بالظبط وبعد اما لقاها مارديتش عليه قاللها هو انتى المفروض يطلعلك مكافأة اد ايه

ايمان باستغراب مكافأة ايه انا المفروض طالما ماكملتش ٢١ سنة فى الشغل حتى المعاش مش هاخده

سليم يعنى اربع سنين ماشى نبقى نتكلم فى الموضوع ده بعد اربع سنين لو هيبقى لك معاش كويس

ايمان پصدمة بعد اربع سنين يا اخى قول ان شاء الله

سليم بصلها وبعدين ابتسم وقاللها طب انا محتاج العربية بكرة فى كام مشوار كده

ايمان بتوجس يعنى ايه محتاجها طب ما المفاتيح معاك اصلا من الصبح

سليم لا مش كده انا قصدى انك هتروحى الشغل وترجعى مواصلات

ايمان يعنى حتى مش هتوصلنى

سليم معلش بقى حاولى تجتهدى شوية لانى هحتاجها الفترة الجاية جامد ومش هينفع اتنطط فى المواصلات

ايمان بفضول والفترة الجاية دى اللى هتبقى اد ايه كده مثلا

سليم مش عارف لسه انا بظبط حالى بس احتمال فترة طويلة شوية

ايمان طب ماتجيبلك عربية

سليم وليه يبقى فى عربيتين طالما فى واحدة هتقضى الغرض

ايمان لا طبعا بالشكل ده هى هتقضى الغرض بالنسبة لك انت بس لكن انا لو تودينى وتجيبنى ماشى لكن تاخدها وترمينى انا فى المواصلات يبقى لا .. ماينفعش ياسليم

سليم وايه المشكلة يعنى

ايمان المشكلة ان احنا فى المعادى والشغل بتاعى فى المهندسين يبقى هحتاج اركب مواصلات كل يوم مش اقل من ساعة ونص رايح وساعة ونص كمان وانا راجعة يا اما هاخد تاكسيات يوميا يبقى ايه اللى يجبرنى اعمل كل ده وانا عربيتى موجودة

سليم باستهجان عربيتك

ايمان ايوة عربيتى ايه اللى قلته غلط مش فاهمة

سليم بزعل لا ابدا انتى ماقلتيش حاجة غلط انا بس اللى العشم كان واكلنى بزيادة عموما انا متشكر مش عاوز حاجة

ايمان بنرفزة هو ايه اصله ده انا مش فاهمة هو فى ايه انا مامنعتش عنك العربية على فكرة وانا بنفسى اللى اديتلك مفاتيحها الصبح بايدى وماقلتلكش لا بس طلبت منك توصلنى وتجيبنى خصوصا ان مش من حقى اركب الباص بتاع البنك ولان العربية دى من الاساس البنك مديهالى بالقسط بدل ما اركب الباص مع ب

الفصل الثالث

ايمان سابته وراحت ناحية اوضتها وهى متضايقة جدا من النتيجة اللى وصلوالها فى كلامهم وسليم كمان رغم انه حس انه زودها اوى فى طريقة كلامه لكن سكت وماحاولش يصلح الموقف وسابها من غير اى كلام زيادة

ايمان لبست وراحت ناحية باب الشقة فسليم نده عليها وقال لها مش معنى اننا مختلفين فى الراى اننا هنتخاصم زى العيال الصغيرين

ايمان التفتت وبصتله وقالت ياريتنا كنا عيال صغيرين ياسليم على الاقل كنت قلت انك ماتقصدش اللى قلته واتدورت تانى وفتحت الباب ونزلت

سليم نفخ بعزم مافيه ودخل على اوضتهم غير هدومه ونزل ولقى ايمان اخدت مفتاح عربيتها من الميدالية

اللى معاه فقال لازم تنسحب من لسانك وتقول اللى قلته البس بقى اديك هتتشحور فى المواصلات

ايمان على الساعة واحدة جالها تليفون من مشرفة الباص بتاع امنية وقالتلها ان امنية تعبانة وحرارتها عالية فلما ايمان قالتلها انها هتروح تاخدها مشرفة الباص قالتلها انهم فى الطريق للبيت اصلا لكن عاوزة حد يبقى موجود فى البيت عشان ياخد باله من البنت

ايمان استأذنت من الشغل ونزلت جرى رجعت على البيت لقت امنية وصلت ونامت فى السرير بهدومها

ايمان ساعدتها تقوم تغير هدومها وعملت لها كمادات واديتها خافض للحرارة وكلمت الدكتورة بتاعة امنية حكيتلها اللى حصل باختصار فقالتلها على اسم علاج كلمت الصيدلية جابتهولها واديتهولها

دخلت المطبخ بسرعة بعد كده وابتدت تعمل اكل وشوربة عشان امنية وقبل ماتخلص بدقايق لقت سليم راجع من برة

دخل ولما لقاها فى المطبخ استغرب وقاللها ايه ده انتى جيتى بدرى يعنى لا وكمان شكلك طبختى ريحة الاكل مفحفحة

ايمان وهى بتسند ايديها الاتنين قدامها على الرخامة وقالت بوجوم كلمونى من المدرسة النهاردة وبلغونى ان امنية حرارتها عالية فجيت جرى عشان الحقها

سليم بخضة ليه .. ايه اللى حصل

ايمان پغضب اللى حصل ان سيادتك عشان تمشى اللى فى دماغك البنت نامت طول الليل على الكنبة فى الليفنج من غير غطا فى عز التلج ده وكمان ما اخدتش كفايتها فى النوم وعييت

سليم وهو بيحاول يهون الموضوع الدنيا برد والناس كلها بتعيا ماتعمليلناش موال على الفاضى

ايمان انت لسه برضة بتكابر ومقتنع انك مش غلطان

سليم ااه مش غلطان ماكفرتش انا عشان عاوز اقعد اسهر شوية مع بنتى اللى ماشفتهاش من اربع سنين

ايمان وهى بتحضر صينية اكل لامنية واضح جدا انى مش هاخد منك لا حق ولا باطل

اخدت الاكل وراحت ناحية اوضة بنتها لقت ان الحرارة يادوب بقت معقولة فابتدت تنده عليها علشان تتعدل وتاكل وتاخد الدوا

امنية بتعب مش قادرة ياماما سيبينى انام

ايمان قومى كلى وخدى العلاج وابقى نامى تانى زى مانتى عاوزة ياللا

امنية ابتدت تقوم وايمان سندتها عشان تقعد وحطت الصينية قدامها وابتدت تسقيها الشوربة وتأكلها وبعد ماخلصت اديتلها العلاج وقالتلها لو عاوزة تنامى تانى نامى

امنية بعياط انا اسفة يا ماما حقك عليا بس بالله عليكى ماتزعلى منى انا عارفة انى غلطانة بس خلاص والله حرمت اعمل حاجة تضرنى تانى

ايمان بصتلها بعتاب وقالتلها يعنى انتى كنتى عارفة انك كنتى بتضرى نفسك

امنية هزت راسها بالموافقة وهى لسه بټعيط وقالت بس خلاص والله وعد انها مش هتتكرر تانى اللى حصل النهاردة خلانى حرمت

ايمان بفضول وايه اللى حصل النهاردة

امنية عيطت اوى وقالت نمت فى اللجنة ومالحقتش اخلص الامتحان

ايمان پصدمة مش فاهمة .. يعنى سيبتى اد ايه من الامتحان من غير ماتخلصيه

امنية وهى بټعيط باڼهيار سيبت سؤال كامل من غير ما احله

ايمان بحزن خلاص يا امنية اللى حصل حصل وياريت تعتبريه درس فى حياتك ماتنسيهوش ان مستقبلك اهم من اى حاجة تانية فى الدنيا دى

ايمان اخدت الصينية وقامت واول ما التفتت لقت سليم كان واقف على الباب وواضح انه كان واقف من بدرى فبصتله بغيظ وخبطته وهى خارجة سليم راح قعد جنب امنية وجسها بايده وقاللها سلامتك يامونى الف سلامة عليكى ياحبيبتى تحبى اجيبلك حاجة

امنية وهى بتمسح دموعها ااه يا بابا لو سمحت .. ناولنى كتاب الساينس من على المكتب عشان عاوزة اراجع شوية

سليم طب وانتى هتقدرى تذاكرى وانتى تعبانة كده

امنية معلش هراجع على شوية حاجات وبعدين هنام

كانت ايمان رجعت

—

من المطبخ ومعاها كوباية ينسون حطيتها من ايدها وقالت طالما قادرة .. قومى اتوضى وصلى الاول ياللا وبعدين اقعدى اعملى اللى انتى عاوزاه بس هنا فى اوضتك ماتطلعيش برة عشان ماتستهويش زيادة

امنية وهى بتقوم من السرير حاضر

سليم بتردد طب ماتسيبيها ترتاح طالما تعبانة

ايمان بصتله بغيظ وقالت هو مافيش فايدة لو سمحت حاول تسيبنى اتصرف اليومين دول بس ارجوك ومش الصلاة اللى هتتعبها خالص على فكرة

سليم قالها بمكابرة انا عارف طبعا انا بس كنت بقول

ايمان قاطعته وقالت خلاص ياسليم .. خلاص ارجوك تعالى عشان احطلك تتغدا لو هتاكل

سليم بتساؤل وانتى مش هتتغدى

ايمان بتنهيدة ماليش نفس

سليم بس انتى مابتتعشيش ومابتفطريش كمان كده غلط عليكى

ايمان

بصت لسليم بحزن وقالت لما اجوع هاكل ياللا عشان احطلك الاكل

وسابته وراحت ناحية المطبخ حضرتله الاكل وخرجت فسليم مسكها من دراعها وقاللها طب مش هتقعدى معايا وانا باكل

ايمان هروح اشوف امنية

سليم طب اقعدى معايا شوية على الاقل احس انى رجعت مش لسه فى الغربة مش هاكل لوحدى هناك وهنا

ايمان بصتله بحزن بس راحت قعدت قصاده وهو قعد وابتدى ياكل ايمان كانت عاملة شوربة خضار و رز وملوخية فسليم ضحك وقال ياااه انا بقالى سنين مادوقتش الملوخية دى ولا حتى شوربة الخضار

ايمان اومال كنت بتاكل ايه

سليم كبيرى كنت اسلق الفراخ واللا اللحمة واشرب شوربتهم كده سادة وياريتها كمان كانت بتبقى عدلة بس اتعودت هعمل ايه

ايمان معلش اديك رجعت بالسلامة

سليم خلص اكل وايمان ما اتكلمتش ولا كلمة تانية فسليم قال تسلم ايديكى يا ايمان الاكل يجنن

ايمان قامت وابتدت تروق مطرح ما اكل وقالت بالهنا والشفا

سليم وقف وراها وهى بتغسل الاطباق وقاللها فى ودنها حقك عليا انا ماكانش قصدى اضايقك كده بكلامى انا ماكنتش اقصد

ايمان سابت اللى فى ايدها والتفتتله وبصتله بتركيز وقالتله ماكنتش تقصد ايه بالظبط ياسليم

سليم الكلام اللى قلته الصبح يا ايمان ماتقفشيش اوى كده بقى

ايمان يا ترى انهى كلام يا سليم ما انت اصلك قلت حاجات كتير اوى من ساعة مارجعت

سليم يووه بقى يا ايمان ماقلتلك مش قصدى خلاص بقى

ايمان طب لو مش قصدك ياسليم بصحيح تقدر تقوللى انت جمعت مبلغ اد ايه وناوى تعمل بيهم ايه

سليم ببعض الڠضب يووه هو انتى ليه مصممة تعملى مشكلة على مافيش

ايمان ابتسمت بسخرية ولفت تانى ناحية الحوض وابتدت تكمل اللى بتعمله وقالت على ماتغسل ايدك هكون خلصت وعملتلك الشاى ياسليم

سليم نفخ بغيظ وخرج من المطبخ وهو بيشوط فى الهوا

ايمان عملتله الشاى وحطته فى الليفنج وراحت قعدت مع امنية وراجعت معاها شوية وبعدين عملتلها سندوتش وينسون وبعد ما اكلتها اديتها العلاج بتاعها وقالتلها ياللا يا امنية العشا آذنت صلى ياللا وعلى السرير فورا هصحيكى على الساعة واحدة اديكى الدوا وتكملى نوم عشان بس تتنبهيلى

امنية حاضر

ايمان سابتها وراحت اوضتها اتوضت وصلت وخرجت بعد كده اتطمنت ان امنية فى سريرها فراحت لسليم وقالتله تحب اعملك سندوتش تتعشى

سليم لا لسه ماجوعتش شوية كده

ايمان طب انا هعملك سندوتش واسيبهولك فى المطبخ وقت ماتجوع تبقى تاكل

سليم ليه وانتى رايحة فين

ايمان هنام .. محتاج حاجة غير العشا

سليم باعتراض عاوزك انتى يا ايمان عاوز مراتى عاوزك تقعدى معايا ونتكلم سوا هو انا راجع من الغربة عشان اقعد لوحدى ماكنت فضلت هناك وخلاص بقى

ايمان راحت قعدت قصاده وقالتله انا اهوه قعدت حابب تتكلم فى ايه

سليم بزهق هو انا اللى هقوللك نتكلم فى ايه يا ايمان انتى اللى المفروض تتكلمى احكيلى عن حياتكم كنتم بتعملوا ايه لوحدكم كنتم بتروحوا فين وبتقضوا يومكم ازاى

ايمان ابتسمت بۏجع وقالتله من سنين فاتت لما كنت بحاول احكيلك على الحاجات دى كنت بتضايق وتقوللى انك مش فاضى او عاوز تنام وكنت تقفل معايا المكالمة بسرعة .. فاكر